វិទ្យុជាតិកម្ពុជា៖លោក ជួន បូណា ១៧ ០៣ 

ភ្នំពេញ៖ ឯកឧត្តមរដ្ឋមន្ត្រី ថោ ជេដ្ឋា ស្នើដល់ភាគីចិនវិនិយោគលើហេដ្ឋារចនាសម្ព័ន្ធទឹកនៅកម្ពុជា ដើម្បីទ្រទ្រង់ផលិតភាពកសិកម្ម ការពង្រឹងប្រព័ន្ធព្យាករណ៍អាកាសធាតុ និងការការពារទឹកជំនន់ និងការពង្រឹងអភិបាលកិច្ចទឹកនិងកិច្ចសហប្រតិបត្តិការទឹកឆ្លងដែន។
  

   ថ្លែងក្នុងជំនួបពិភាក្សាការងារទ្វេ ភាគីជាមួយឯកឧត្តម Li Guoying រដ្ឋមន្រ្តីក្រសួងធនធានទឹកនៃសាធារណរដ្ឋប្រជាមានិតចិន នៅទីស្តីការក្រសួងធនធានទឹក និងឧតុនិយម នាព្រឹកថ្ងៃទី១៧ ខែមីនា ឆ្នាំ២០២៥ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានបញ្ជាក់ឡើងវិញនូវចំណងមិត្តភាពដ៏រឹងមាំកម្ពុជា- ចិន និងទំនាក់ទំនងកិច្ចសហប្រតិ បត្តិការដៃគូយូរអង្វែង ជាពិសេសក្នុងការគ្រប់គ្រងធនធានទឹក ដើម្បីចូលរួមការអភិវឌ្ឍប្រកបដោយចីរភាពនៅកម្ពុជា។ 
 ក្នុងជំនួបពិភាក្សានេះដែរ ឯកឧត្តមរដ្ឋមន្ត្រី បានបញ្ជាក់ពីជំហរក្នុងការបង្កើនទំនាក់ទំនងទ្វេភាគីរវាងប្រទេសទាំងពីរ ហើយបានប្តេជ្ញាពង្រឹងក្របខ័ណ្ឌកិច្ចសហប្រតិបត្តិការពេជ្រ សំដៅកសាងសហគមន៍កម្ពុជា-ចិននៃអនាគតរួមគ្នាប្រកប ដោយគុណភាពខ្ពស់ កម្រិតខ្ពស់ និងស្តង់ដាខ្ពស់។ 
   ទន្ទឹមនឹងនេះ ឯកឧត្តមរដ្ឋមន្ត្រីក៏បានស្នើដល់ភាគីចិន ដើម្បីស្វែង រកនូវកិច្ចសហប្រតិបត្តិការទ្វេភាគីលើកិច្ចការមួយចំនួនដូចជា៖ ទី១)ការវិនិយោគលើហេដ្ឋារចនា សម្ព័ន្ធទឹក ជាពិសេសក្នុងការធ្វើទំនើបកម្មប្រព័ន្ធធារាសាស្ត្រឱ្យមានភាពពេញលេញ ទី២)ការកសាងសមត្ថភាព និងការផ្ទេរបច្ចេកវិទ្យា ដើម្បីបង្កើនការគ្រប់គ្រងធនធានទឹក ទី៣)ការពង្រីកបណ្តាញធារាសាស្ត្រ និងឧតុនិយម ដើម្បីទប់ទល់នឹងគ្រោះមហន្តរាយ និងទី៤)ការស្រាវជ្រាវរួមគ្នា និងការច្នៃប្រឌិតក្នុងការអភិរក្សទឹក និងធានាភាពធន់នឹងអាកាសធាតុ។
ជាមួយគ្នានេះ ឯកឧត្តមរដ្ឋមន្ត្រីក៏បានជម្រាបជូនគណៈប្រតិភូផងដែរ អំពីបេសកកម្មរបស់ក្រសួងធនធានទឹក និងឧតុនិយម ក្នុងការធានានូវសន្តិសុខទឹក ការអភិវឌ្ឍ និងការគ្រប់គ្រងទឹកប្រកបដោយនិរន្តរភាពសម្រាប់ពហុវិស័យ ជាពិសេស ការអភិវឌ្ឍនិងថែទាំប្រព័ន្ធធារាសាស្ត្រ ដើម្បីទ្រទ្រង់ផលិតភាពកសិកម្ម ការពង្រឹងប្រព័ន្ធព្យាករណ៍អាកាសធាតុនិងការការពារទឹកជំនន់ និងការពង្រឹងអភិបាលកិច្ចទឹកនិងកិច្ចសហប្រតិបត្តិការទឹកឆ្លងដែន ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំប្រកបដោយភាពឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលផ្តោតលើអាទិភាពគន្លឹះចំនួន៥គឺ មនុស្ស ផ្លូវ ទឹក ភ្លើង និងបច្ចេកវិទ្យា។
   ឯកឧត្តមរដ្ឋមន្ត្រីបានថ្លែងនូវការដឹងគុណយ៉ាងជ្រាលជ្រៅចំពោះប្រជាជន និងរដ្ឋាភិបាលនៃសាធារណរដ្ឋប្រជាមានិតចិនដែលជាដៃគូដ៏សំខាន់មិនអាចខ្វះបានក្នុងការអភិវឌ្ឍរបស់កម្ពុជា តាមរយៈការគាំទ្រយ៉ាងពេញទំហឹងលើវិស័យផ្សេងៗ រួមទាំងវិស័យធនធានទឹក ដោយមិនមានលក្ខខណ្ឌស្មុគស្មាញ ហើយដែលកិច្ចសហប្រតិបត្តិការនេះបានជួយដល់វឌ្ឍនភាពរបស់កម្ពុជា ឈានឆ្ពោះទៅសម្រេចចក្ខុវិស័យជាប្រទេសដែលមានចំណូលខ្ពស់នៅឆ្នាំ២០៥០៕