វិទ្យុជាតិកម្ពុជា ៖ ចេម ហួត &យី វិច្ឆិកា ២ ៤ ២០២៥
ភ្នំពេញ ៖ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានថ្លែងអំណរគុណដល់ប្រជាពលរដ្ឋនិងមិត្តបរទេសទាំងអស់ ដែលបានផ្ញើសាររំលែកទុក្ខនិងចូលគោរពវិញ្ញាណក្ខន្ធសព ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន  រដ្ឋលេខាធិការក្រសួងសាធារណការ និងដឹកជញ្ជូន ដែលបានទទួលមរណភាព កាលព្រឹកថ្ងៃទី២៨ ខែមីនា ឆ្នាំ២០២៥ វេលាម៉ោង ០២:២៧នាទី ក្នុងជន្មាយុ ៧៨ឆ្នាំ ដោយរោគាពាធ។

ក្នុងពិធីបញ្ចុះសព ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន រដ្ឋលេខាធិការក្រសួងសាធារណការ និងដឹកជញ្ជូន ដោយមានការអញ្ជើញចូលរួមពីសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី នៃព្រះរាជាណាចក្រកម្ពុជា និងត្រូវជាប្អូនប្រុសសព  សំណាក់គ្រួសារសព និងថ្នាក់ដឹកនាំព្រឹទ្ធសភា រដ្ឋសភា និងរាជរដ្ឋាភិបាល ជាច្រើនរូប នាព្រឹកថ្ងៃទី០២ ខែមេសា ឆ្នាំ២០២៥ នៅវត្តច័ន្ទបុរីវង្ស ស្ថិតក្នុងខណ្ឌព្រែកព្នៅ រាជធានីភ្នំពេញ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានមានប្រសាសន៍ថា ក្នុងនាមក្រុមគ្រួសារសព សូមគោរពថ្លែងអំណរគុណសម្តេច ឯកឧត្តម លោក លោកជំទាវ លោកអ្នកឧកញ៉ា អ្នកឧកញ៉ា លោក លោកស្រី និងភ្ញៀវកត្តិយសទាំងអស់ ដែលបានឆ្លៀតឱកាសដ៏មមាញឹក យាងនិងនិមន្តអញ្ជើញចូលរួមនិងជួយរៀបចំពិធីបុណ្យនិងពិធីបញ្ចុះសពឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន ដែលត្រូវជាបង បងថ្លៃ បិតា ជីតា ជីតាតួត ឪពុកធំ ដែលជាអ្នកមានគុណ។
ឯកឧត្តម ឧបនាយករដ្ឋមន្ត្រី ក៏បានសម្តែងនូវកត្តញ្ញូតាធម៌និងការដឹងគុណដ៏ខ្ពង់ខ្ពស់បំផុត ជូនចំពោះ ភ្ញៀវកត្តិយសជាតិនិងអន្តរជាតិនិងបងប្អូនជិតឆ្ងាយទាំងអស់ ដែលបានចូលរួមតាមរយៈការផ្ញើសាររំលែកទុក្ខក្តី និងចូលរួមគោរពវិញ្ញាណដោយផ្ទាល់ក្ដី និងការយាងនិមន្តអញ្ជើញមកចូលរួមក្នុងពិធីបញ្ចុះសព និងតាមប្រពៃណីព្រះពុទ្ធសាសនានៅទីនេះផងដែរ។
ឯកឧត្តម ឧបនាយករដ្ឋមន្ត្រី បានបន្តថា សកម្មភាពទាំងអស់នេះ បានបញ្ជាក់ឱ្យឃើញយ៉ាងច្បាស់នូវទឹកព្រះទ័យនិងទឹកចិត្តស្រឡាញ់រាប់អានដ៏ឧត្តុងឧត្តមរបស់សម្តេចជាអង្គម្ចាស់ សម្តេចព្រះរាជាគណៈ ព្រះថេរានុថេរៈគ្រប់ព្រះអង្គ ដែលធ្វើឱ្យក្រុមគ្រួសារនិងសព មិនអាចបំភ្លេចនូវគុណូបការៈដ៏ថ្លៃថ្លាទាំងអស់នេះបានឡើយ។
 «យើងខ្ញុំសូមសម្តែងនូវកត្តញ្ញូតាធម៌និងការដឹងគុណដ៏ខ្ពង់ខ្ពស់បំផុត ជូនចំពោះសម្តេច ឯកឧត្តម លោកជំទាវ លោកអ្នកឧញ្ញា អ្នកឧញ្ញា លោក លោកស្រី សមាជិក សមាជិការព្រឹទ្ធសភា រដ្ឋសភា រាជរដ្ឋាភិបាល ភ្ញៀវកត្តិយសជាតិនិងអន្តរជាតិនិងបងប្អូនជិតឆ្ងាយទាំងអស់ដែលបានចូលរួមតាមរយៈការផ្ញើសាររំលែកទុក្ខក្តី តាមរយៈការចូលរួមគោរពវិញ្ញាណដោយផ្ទាល់នាពេលកន្លងមកក្តី និងការយាងនិមន្តអញ្ជើញមកចូលរួមក្នុងពិធីបញ្ចុះសព និងតាមប្រពៃណីព្រះពុទ្ធសាសនានៅទីនេះផងដែរ»។
ក្នុងឱកាសដ៏សែនក្រមក្រំនេះ ឯកឧត្តម ឧបនាយករដ្ឋមន្ត្រីនិងក្រុមគ្រួសារ សូមសម្តែងនូវព្រះករុណាទីគុណប្រកបដោយក្តីរំភើបឥតឧបមា ថ្វាយព្រះករុណាជាអង្គម្ចាស់ជីវិតតម្កល់លើត្បូង ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះវររាជមាតាជាតិខ្មែរជាទីគោរពសក្ការៈដ៏ខ្ពង់ខ្ពស់បំផុត ដែលព្រះអង្គសព្វប្រោសព្រះរាជប្រទានព្រះរាជសារចូលរួមរំលែកទុក្ខនិងបានប្រោសព្រះរាជទានព្រះរាជទ្រព្យដ៏ថ្លៃថ្លាចូលរួមក្នុងព្រះរាជពិធីបុណ្យសព។ 
ឯកឧត្តមឧបនាយករដ្ឋមន្ត្រី និងក្រុមគ្រួសារសព សូមថ្វាយព្រះរាជកុសលបវរមហាប្រសើរ សូមព្រះអង្គប្រកបដោយសុភមង្គលនិងវិបុលសុខគ្រប់ប្រការផងដែរ។
សូមបញ្ជាក់ថា ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន ដែលជាបងប្រុសបង្កើតរបស់ សម្តេចតេជោ ហ៊ុន សែន បានទទួលមរណភាព នៅវេលាម៉ោង ២៖២៧នាទីព្រឹក ថ្ងៃទី២៨ ខែមីនា ឆ្នាំ២០២៥ ក្នុងជន្មាយុ៧៨ឆ្នាំ ដោយរោគាពាធ៕