វិទ្យុជាតិកម្ពុជា លោកស្រី ធៀង ស្រីមុំ ថ្ងៃទី១៥ ខែមេសា ឆ្នាំ២០២៥
តាមរបាយការណ៍របស់មន្ទីរទេសចរណ៍ខេត្តសៀមរាប បានបញ្ជាក់ថា នៅថ្ងៃទី ១៤ ខែ មេសា ឆ្នាំ២០២៥ ដែលជាថ្ងៃទី១ នៃព្រឹត្តិការណ៍អង្គរសង្រ្កាន្ត ភ្ញៀវទេសចរ និងបងប្អូនប្រជាពលរដ្ឋ សរុបមានចំនួនប្រមាណ ៧៩៤,៥៣៧នាក់ បានដើរលេងកម្សាន្តក្នុងខេត្តសៀមរាប ក្នុងនោះ៖
-  ភ្ញៀវទេសចរបរទេសមានចំនួន ៤,៥៣៧ នាក់។
-  ភ្ញៀវទេសចរជាតិ និងបងប្អូនប្រជាពលរដ្ឋមានចំនួន ប្រមាណ ៧៩០,០០០ នាក់ ក្នុងនោះ ៖
- ក្នុងព្រឹត្តិការណ៍អង្គរសង្ក្រាន្តតំបន់អង្គរ សួនច្បារមុខព្រះរាជដំណាក់ តំបន់មាត់ស្ទឹង និងតំបន់ផាប់ស្ត្រីត មានចំនួនប្រមាណ ៧៦០,០០០ នាក់។
  - តំបន់ភ្នំគូលែន មានចំនួនប្រមាណ ៤,៥០០ នាក់។
  - តំបន់បឹងទន្លេសាប មានចំនួនប្រមាណ ៦,៥០០ នាក់។
  - បារាយណ៍ទឹកថ្លា មានចំនួនប្រមាណ ៤,០០០ នាក់។
  - តំនប់សហគមន៍ និងរមណីយដ្ឋានផ្សេងៗ មានចំនួនប្រមាណ ១៥,០០០ នាក់។
សូមជម្រាបថា ព្រឹត្តិការណ៍អង្គរសង្ក្រាន្ត ឆ្នាំ២០២៥ បានរៀបចំឡើងរយៈពេល៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥ ក្រោមប្រធានបទ«ញញឹមសាទរសង្ក្រាន្តឆ្នាំថ្មី» ក្នុងគោលបំណងជួបជុំយុវជន និងមហាជន ដើម្បីចូលរួមអបអរសាទរ ពិធីបុណ្យចូលឆ្នាំថ្មីប្រពៃណីជាតិខ្មែរ ជាមហាគ្រួសារខ្មែរ។ បន្ថែមពីនេះអង្គរសង្ក្រាន្តក៏មានគោលបំណង រម្លឹក និងធ្វើឱ្យរស់រវើកឡើងវិញនៃ“មរតកបេតិកភណ្ឌអរូបី នៅលើទីតាំងនៃមរតកបេតិកភណ្ឌរូបី” ដែលធ្វើឱ្យ“អង្គរមានជីវិត” ជាពិសេសនោះគឺផ្តល់ឱកាសឱ្យយុវជន ប្រជាជន ភ្ញៀវទេសចរជាតិ និងអន្តរជាតិបានឈ្វេងយល់ និងទទួលបានបទពិសោធន៍ល្អៗជាច្រើនឥតគណនា បន្ថែមអំពីភាពរុងរឿង ល្បីល្បាញ ភាពសម្បូរបែបនៃវប្បធម៌ អរិយធម៌ខ្មែរ ក៏ដូចជាផ្តល់ឱកាសឱ្យពាណិជ្ជករ សហគ្រិន អាជីវករ ផលិតផលពាណិជ្ជកម្ម សិប្បកម្ម និងសេវាកម្មនានា ទទួលបានប្រយោជន៍ធុរកិច្ចពីកំណើនទេសចរ៕