វិទ្យុជាតិកម្ពុជា កញ្ញា ខៀវ ណាវីន
អន្តរជាតិ៖ កាលពីថ្ងៃសៅរ៍ រុស្ស៊ីបានចោទប្រកាន់អ៊ុយក្រែនពីបទធ្វើ "ការវាយប្រហារភេរវកម្ម" លើជនស៊ីវិលនៅទីក្រុង Belgorod និងប្រើប្រាស់គ្រាប់បែកចង្កោមដែលត្រូវបានហាមឃាត់។ នេះបើយោងតាមការចេញផ្សាយដោយសារព័ត៌មាន CNA។ រុស្ស៊ីបាននិយាយថា អ៊ុយក្រែនបានវាយប្រហារទីក្រុង Belgorod ដោយមីស៊ីល និងគ្រាប់រ៉ុក្កែត ដោយបានសម្លាប់មនុស្សយ៉ាងហោចណាស់ ២១ នាក់ និងមនុស្សជាច្រើននាក់ទៀតរងរបួស ក្នុងនោះមានកុមារ ១៧ នាក់ផងដែរ។ លោក Vasily Nebenzya ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិបាននិយាយថា វាគឺជា "ការវាយប្រហារភេរវកម្មដោយរបបទីក្រុង Kyiv ប្រឆាំងនឹងទីក្រុងស៊ីវិល"។ លោកបានបន្តទៀតថា "ដើម្បីបង្កើនចំនួនអ្នកស្លាប់ និងរបួសនៃការវាយប្រហារភេរវកម្ម ពួកគេបានប្រើប្រាស់គ្រាប់បែកចង្កោម"។ "វាជាការវាយប្រហារដោយចេតនា និងមិនរើសអើងប្រឆាំងនឹងគោលដៅជនស៊ីវិល"។ លោក John Kelly តំណាងសហរដ្ឋអាមេរិកក៏បានបន្ទោសលោក Vladimir Putin ប្រធានាធិបតីរុស្ស៊ីផងដែរ។ លោកបាននិយាយថា នេះជាសង្គ្រាមរបស់ពូទីន វាជាជម្រើសរបស់គាត់។ "រុស្ស៊ីអាចបញ្ចប់សង្គ្រាមនេះនៅថ្ងៃនេះ យើងអំពាវនាវឱ្យមានការការពារជនស៊ីវិលនៅគ្រប់ភាគីនៃជម្លោះទាំងអស់"៕
Comments