វិទ្យុជាតិកម្ពុជា៖ សុភា វិសិទ្ធិពង្ស
MC : លោក ប៊ូ វរសក្ស នាយកកម្មវិធីអង្គការជីវិតសត្វស្លាបប្រចាំកម្ពុជាបានប្រាប់ឱ្យដឹងថា ការកសាងអណ្តូងទឹក សម្រាប់ស្នាក់ការឧទ្យានុរក្សអូរហានៃដែនជម្រកសត្វព្រៃលំផាត់នេះ មានសារសំខាន់ណាស់ ដើម្បីផ្តល់ទឹកជូនមន្ត្រីឧទ្យានុរក្សបានប្រើប្រាស់គ្រប់គ្រាន់ និងជួយគាំទ្រដល់ការយាមល្បាតកាន់តែប្រសើរជាងមុន ។
លោកបន្តថា បច្ចុប្បន្នមានស្នាក់ការរងចំនួន២នៅតំបន់ស្នូល នៃដែនជម្រកសត្វព្រៃលំផាត់ ដែលនេះជាស្នាក់ការចាស់ គឺមានស្រះទឹករួចមកហើយ តែស្នាក់ការរងថ្មីគឺតម្រូវឱ្យជីក អណ្តូងទឹកសម្រាប់ជួយសម្រួល ដល់មន្ត្រីឧទ្យានុរក្សដែលនៅការពារក្នុងតំបន់នោះ ព្រោះតែងតែខ្វះទឹកសម្រាប់ប្រើប្រាស់ ជាពិសេសនៅរដូវប្រាំង ។
សំឡេង « ទាក់ទងទៅនឹងការកសាងអណ្តូងទឹកនេះ គឺការជួយគាំទ្រដល់ឧទ្យានុរក្ស ដើម្បីធ្វើឱ្យគាត់ធ្វើការល្បាតក្នុងតំបន់នោះមានប្រសិទ្ធភាព ព្រោះនៅពេលរដូវប្រាំងគាត់ត្រូវជិះពី១០គីឡូទៅ២០គីឡូម៉ែត្រ ដើម្បីទៅរកប្រភពទឹក សម្រាប់ដងយកមកប្រើប្រាស់បាន អ៊ីចឹងវាធ្វើឱ្យខាតពេលសម្រាប់ការដើរល្បាត។ ហេតុនេះយើងសម្រេចចិត្តបុកអណ្តូងនៅទីតាំងនោះ គាត់មានពេលគ្រប់គ្រាន់ក្នុងការដើរល្បាត អ៊ីចឹងគាត់អាចស្នាក់នៅជាប្រចាំក្នុងទីតាំងនោះបាន » ។
លោកបានបន្ថែមថា កន្លងមកអង្គការ BirdLife បានជួយឧបត្ថម្ភគាំទ្រជាឧបករណ៍ល្បាត បន្ទប់ទឹក អង្ករ និងសម្ភារផ្សេងៗទៀត សម្រាប់ជួយដល់មន្ត្រីឧទ្យានុរក្សដែលនៅការពារនៅតំបន់អូរហានៃដែនជម្រកសត្វព្រៃលំផាត់ ។
សូមបញ្ជាក់ថា អង្គការនេះបានធ្វើការនៅជម្រកសត្វព្រៃនេះតាំងពីឆ្នាំ២០០៥ ដោយធ្វើការផ្តោតលើវិស័យចំនួន៣ធំៗគឺ ទី១.អង្កេតតាមដានជីវចម្រុះនិងអភិរក្សពូជសត្វ ទី២.ធ្វើការគាំទ្រដល់សហគមន៍ឱ្យមានការចូលរួមពីសហគមន៍ក្នុងការងារគ្រប់គ្រងដែនជម្រកសត្វព្រៃលំផាត់ ទី៣.គាំទ្រដល់ការងារគ្រប់គ្រងដែនជម្រក ដោយធ្វើការជាមួយឧទ្យានុរក្សទាំងអស់ នឹងគាំទ្រការអនុវត្តច្បាប់ឱ្យមានប្រសិទ្ធភាព ៕
Comments