ឥណ្ឌូនេស៊ី បន្ធូរបន្ថយច្បាប់ពន្ធលើការនាំចូលរថយន្ត EV

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ នៅក្នុងការដេញថ្លៃដើម្បីទាក់ទាញការវិនិយោគបន្ថែមលើវិស័យរថយន្តអគ្គិសនី (EV) រដ្ឋាភិបាលឥណ្ឌូនេស៊ីបាន ប្រកាសបទប្បញ្ញត្តិថ្មីដែលផ្តល់ការលើកទឹកចិត្តផ្នែកពន្ធដល់ក្រុមហ៊ុនផលិតរថយន្ត EV ។ នេះបើយោងតាមការចេញផ្សាយដោយសារព័ត៌មាន Vietnam Plus។ បទប្បញ្ញត្តិរបស់ប្រធានាធិបតីដែលបានចុះហត្ថលេខានៅថ្ងៃទី ៨ ខែធ្នូ បានពង្រីកអត្ថប្រយោជន៍ពន្ធដល់ក្រុមហ៊ុនដែល បានបណ្តាក់ទុនរួចហើយនៅក្នុងការផលិតរថយន្ត EV អ្នកដែលមានគម្រោងបង្កើនការវិនិយោគ EV របស់ពួកគេ ឬអ្នកដែលមានបំណងវិនិយោគថ្មីនៅក្នុងវិស័យនេះ។ បទប្បញ្ញត្តិថ្មីនឹងផ្តល់ឱ្យក្រុមហ៊ុនផលិតរថយន្តដែលមានគម្រោងសាងសង់រោងចក្ររថយន្តអគ្គិសនី ទទួលបានការលើកទឹក ចិត្តលើការនាំចូលរថយន្ត EVs ដែលផលិតទាំងស្រុងរបស់ពួកគេរហូតដល់ឆ្នាំ ២០២៥។ ច្បាប់ថ្មីនេះ នឹងដកពន្ធនាំចូល និងពន្ធលើការ លក់ទំនិញប្រណីតលើយានជំនិះដែលនាំចូលមកក្នុងប្រទេស ហើយផ្តល់ការលើកទឹកចិត្តលើពន្ធដែលប្រមូលដោយរដ្ឋាភិបាលខេត្ត។ ទោះជាយ៉ាងណាក៏ដោយ ចំនួនរថយន្តដែលក្រុមហ៊ុនអាច នាំចូលបានគឺអាស្រ័យលើទំហំវិនិយោគ និងការអភិវឌ្ឍន៍របស់រោងចក្រ ហើយត្រូវតែមានការយល់ព្រមពីក្រសួងវិនិយោគ៕