ក្នុងរយៈពេលជិត ២ ខែនៃឆ្នាំ ២០២៤ រំហូរ FDI របស់វៀតណាមកើនឡើងជាង ៣៨%

វិទ្យុជាតិកម្ពុជា កញ្ញា ខៀវ ណាវីន

 
អន្តរជាតិ៖ បើយោងតាមទីភ្នាក់ងារវិនិយោគបរទេសក្រោមក្រសួង ផែនការ និងការវិនិយោគបានឱ្យដឹងថា វៀតណាមបានទាក់ទាញការវិនិយោគផ្ទាល់ពីបរទេស (FDI) ជាង ៤,២៩ ពាន់លានដុល្លារអាមេរិក ចាប់ពីដើមឆ្នាំនេះដល់ថ្ងៃទី ២០ ខែកុម្ភៈ ដែលជាកំណើន ៣៨,៦ ភាគរយពីមួយឆ្នាំទៅមួយឆ្នាំ។ នេះបើយោងតាមការចេញផ្សាយដោយសារព័ត៍មាន Xinhua។ ទីភ្នាក់ងារសារព័ត៌មានវៀតណាមបានរាយការណ៍ថា ក្នុងអំឡុងពេលដែលបានលើកឡើង វៀតណាមបានកត់ត្រាគម្រោង FDI ដែលបានចុះបញ្ជីថ្មីចំនួន ៤០៥ ជាមួយនឹងការវិនិយោគជិត ៣,៦ ពាន់លានដុល្លារ។ ក្នុងចំណោមវិស័យសេដ្ឋកិច្ចទាំង ១៦ ដែលបានទទួល FDI ក្នុងអំឡុងពេលនេះ ឧស្សាហកម្មកែច្នៃ និងផលិតកម្មបាននាំមុខគេជាមួយនឹងទឹកប្រាក់ជិត ២,៥៤ ពាន់លានដុល្លារ ដែលស្មើនឹង ៥៩,២ ភាគរយនៃចំនួនសរុប និងកើនឡើង ១៦,៨ ភាគរយពីមួយឆ្នាំទៅមួយឆ្នាំ។ ក្រសួងបាននិយាយថា វិនិយោគិនសិង្ហបុរីបានគ្រប់គ្រងរំហូរ FDI ចូលទៅក្នុងប្រទេសវៀតណាមជាង ២,០៨ ពាន់លានដុល្លារស្មើនឹង ៤៨,៥ ភាគរយនៃការវិនិយោគសរុប បន្ទាប់មកដោយទីក្រុងហុងកុងរបស់ប្រទេសចិនដែលមានទឹកប្រាក់ជិត ៥២៥,៧ លានដុល្លារ៕