កំពង់ផែសមុទ្រខ្មៅអ៊ុយក្រែនចំនួន ៣ អាចនឹងបន្ថែម ៨ ភាគរយដល់ GDP របស់ប្រទេសនៅឆ្នាំក្រោយ

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ ទីភ្នាក់ងារសារព័ត៌មាន Ukrinform បានរាយការណ៍ដោយដកស្រង់សម្តីលោក Oleksandr Kubrakov ឧបនាយករដ្ឋមន្ត្រីថា ប្រតិបត្តិការនៃកំពង់ផែសមុទ្រខ្មៅអ៊ុយក្រែនចំនួន ៣ អាចនឹងបន្ថែម ៨ ភាគរយដល់ GDP របស់ប្រទេសនៅឆ្នាំក្រោយ។ នេះបើយោងតាមការចេញផ្សាយដោយសារព័ត៌មាន Xinhua។ លោក Kubrakov បាននិយាយថា ប្រតិបត្តិការទាំងមូលនៃកំពង់ផែ Odesa, Chornomorsk និង Pivdenny នឹងអនុញ្ញាតឱ្យអ៊ុយក្រែនជំរុញការនាំចេញកសិកម្មនិងលោហធាតុរបស់ខ្លួនដែលបានថយចុះចាប់តាំងពីការចាប់ផ្តើមនៃជម្លោះជាមួយរុស្ស៊ី។ ចាប់តាំងពីខែកញ្ញាមក មន្ត្រីរូបនេះបាននិយាយថា អ៊ុយក្រែនបាននាំចេញទំនិញជិត ៩ លានតោនតាមច្រករបៀងបណ្តោះអាសន្នក្នុងសមុទ្រខ្មៅ ដែលស្មើនឹងប្រហែល ៧០ ភាគរយនៃផលិតផលកសិកម្មរបស់ខ្លួន។ កាលពីខែសីហា អ៊ុយក្រែនបានបង្កើត "ច្រករបៀងមនុស្សធម៌" សម្រាប់កប៉ាល់ដឹកទំនិញនៅសមុទ្រខ្មៅ ជាជម្រើសមួយសម្រាប់គំនិតផ្តួចផ្តើមគ្រាប់ធញ្ញជាតិសមុទ្រខ្មៅ ដែលបានដួលរលំនៅក្នុងខែកក្កដា។ រដ្ឋាភិបាលអ៊ុយក្រែនរំពឹងថា GDP របស់ប្រទេសនេះនឹងកើនឡើង ៤,៦ ភាគរយនៅឆ្នាំក្រោយ៕