GDP របស់ម៉ាឡេស៊ីត្រូវបានប៉ាន់ប្រមាណថានឹងកើនឡើងបន្ថែមទៀតនៅ ៣,៩% នៅក្នុងត្រីមាសទី១

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ ទិន្នន័យផ្លូវការបានបង្ហាញថា ផលិតផលក្នុងស្រុកសរុប (GDP) របស់ប្រទេសម៉ាឡេស៊ីត្រូវបានប៉ាន់ប្រមាណថានឹងកើនឡើងបន្ថែមទៀតនៅ ៣,៩ ភាគរយនៅក្នុងត្រីមាសទីមួយនៃឆ្នាំ ២០២៤។ នេះបើយោងតាមការចេញផ្សាយដោយសារព័ត៌មាន Xinhua។ នាយកដ្ឋានស្ថិតិម៉ាឡេស៊ី (DOSM) បាននិយាយនៅក្នុងសេចក្តីថ្លែងការណ៍មួយថា ដោយផ្អែកលើការប៉ាន់ប្រមាណកម្រិតខ្ពស់ កំណើនសេដ្ឋកិច្ចរបស់ប្រទេសម៉ាឡេស៊ីត្រូវបានគេរំពឹងថានឹងកើនឡើងធៀបនឹង ៣ ភាគរយនៅក្នុងត្រីមាសមុន។ យោងតាម DOSM លទ្ធផលសេដ្ឋកិច្ចនៅក្នុងត្រីមាសនេះនឹងត្រូវបានដឹកនាំដោយវិស័យសេវាកម្ម ដោយវិស័យសំខាន់ៗទាំងអស់មានការរីកចម្រើនជាវិជ្ជមាន។ វិស័យសេវាកម្មត្រូវបានគេមើលឃើញថានឹងកើនឡើង ៤,៤ ភាគរយនៅក្នុងត្រីមាសទី ១ ឆ្នាំ ២០២៤ បើធៀបនឹង ៤,២ ភាគរយនៅក្នុងត្រីមាសទី ៤ ឆ្នាំ ២០២៣។ កំណើននេះនឹងត្រូវបានគាំទ្រដោយពាណិជ្ជកម្មលក់ដុំ និងរាយ ការដឹកជញ្ជូន និងការផ្ទុក និងអនុវិស័យសេវាកម្មអាជីវកម្ម៕