វិទ្យុជាតិកម្ពុជា ៖ ស៊ឹង សុផារី ៣១.០៣.២០២៥

 

   ឯកឧត្ដម ឃឹម ហ្វីណង់ ថ្លែងថា ភាពច្បាស់លាស់នៃសហគមន៍កសិកម្មទំនើប នឹងជួយឱ្យសមាជិកសហគមន៍ទទួលបានអត្ថប្រយោជន៍ជាច្រើន ទាំងគុណភាពកសិផល បរិមាណ តម្លៃ និងនិរន្តរភាពនៃការផ្គត់ផ្គង់ ។

   ឯកឧត្ដម ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា ការរៀបចំទៅជាសហគមន៍កសិកម្មទំនើប នឹងអនុញ្ញាតឱ្យការធ្វើផលិតកម្មកសិកម្មតាមកិច្ចសន្យានិងការកែច្នៃរវាងអ្នកផលិតនិងអ្នកទិញ មានការកើនឡើងជាបន្តបន្ទាប់ ព្រោះសហគមន៍កសិកម្មទំនើប មានការគ្រប់គ្រង និងបែងចែកការដាំដុះច្បាស់លាស់ ប្រកបដោយ វិជ្ជាជីវៈខ្ពស់ ដើម្បីបង្កើនសមត្ថភាពប្រកួតប្រជែងនៅលើទីផ្សារ ទាំងផ្នែកបរិមាណ គុណភាព តម្លៃ និងនិរន្តរភាពនៃការផ្គត់ផ្គង់ ពោលគឺទិញរួម ផលិតរួម និងលក់រួម។

ឯកឧត្ដម បានបន្តថា សហគមន៍កសិកម្មទំនើប គឺសំដៅទៅលើការផ្លាស់ប្តូរផ្នត់គំនិត របស់កសិករ ពីទម្លាប់នៃការធ្វើកសិកម្មបែបប្រពៃណីដាច់ដោយឡែកពីគ្នា មកចេះធ្វើផលិតកម្មរួមក្នុងសហគមន៍ និងមានផែនការផលិតកម្មរួមច្បាស់លាស់ ជាពិសេសមាន បច្ចេកទេសត្រឹមត្រូវ  ។

« សម្រាប់បងប្អូនដែលជាកសិករសូមឱ្យបងប្អូនយល់ថា ឥឡូវនេះគឺយើងមានសហគមន៍កសិកម្មទំនើប ដែលអាចផ្ដល់ភាពច្បាស់លាស់ជូនបងប្អូន មិនដូចនៅពេលដែលបងប្អូនធ្វើការដាំដុះដោយខ្លួនឯងនោះទេ នៅពេលដែលបងប្អូនដាំនៅជាលក្ខណៈគ្រួសារ  បងប្អូនទទួលយកហានិភ័យពីទីផ្សារទាំងស្រុង ហើយមិនច្បាស់ថាទីផ្សារមានតម្លៃប៉ុន្មាន លក់នៅឯណា ?  គេឱ្យតម្លៃប៉ុន្មានភាគច្រើនគឺយើងទទួលយក ប៉ុន្តែឥឡូវយើងមានសហគមន៍កសិកម្មទំនើប គឺបានដោះស្រាយបញ្ហាបានច្រើន ពីព្រោះយើងដឹងតម្លៃទីផ្សារមានភាពច្បាស់លាស់ យើងមានការគាំពារលើបញ្ហាទីផ្សារ ដូច្នេះមិនរងហានិភ័យ ដូចពេលដែលយើងនៅដាច់ដោយឡែកនោះទេ » ។

ជាងនេះទៅទៀត សហគមន៍កសិកម្មទំនើប មានការទិញធាតុចូល (ជី ថ្នាំ សម្ភារៈកសិកម្ម) សម្រាប់ប្រើប្រាស់រួម , មានការគ្រប់គ្រងនិងអភិវឌ្ឍន៍ទីផ្សាររួម , មានប្រព័ន្ធគ្រប់គ្រង និងថ្នាក់ដឹកនាំអាជីវកម្មប្រចាំថ្ងៃ ដែលមានសមត្ថភាពនិងបទពិសោធច្បាស់លាស់ និងមានគោលការណ៍បែងចែកភាគលាភដែលមានតម្លាភាពនិងគណនេយ្យភាព ដល់សមាជិកទាំងអស់នៅក្នុងសហគមន៍ ៕