វិទ្យុជាតិកម្ពុជា កញ្ញា ខៀវ ណាវីន ថ្ងៃទី០២ មេសា ២០២៥
អន្តរជាតិ៖ កាលពីថ្ងៃទី១ ខែមេសា ក្រសួងសន្តិសុខសាធារណៈរបស់ប្រទេសវៀតណាមបានផ្តល់ជំនួយសង្គ្រោះជិត ៣ តោនដល់ជនរងគ្រោះដោយការរញ្ជួយដីនៅមីយ៉ាន់ម៉ា ខណៈដែលក្រុមជួយសង្គ្រោះបានធ្វើការដោយមិននឿយហត់ដើម្បីជួយសង្គ្រោះដល់អ្នកនៅរស់រានមានជីវិត។ នេះបើយោងតាមការចេញផ្សាយដោយសារព័ត៌មាន Vietnam Plus។ លោកវរសេនីយ៍ឯក ដែលជាប្រធានគណៈប្រតិភូក្រសួងបានប្រគល់គ្រឿងឧបភោគបរិភោគ ទៅកាន់លោកប្រធាននាយកដ្ឋានគ្រប់គ្រងគ្រោះមហន្តរាយ ក្រោមក្រសួងសុខុមាលភាពសង្គម សង្គ្រោះ និងតាំងទីលំនៅថ្មី។ កញ្ចប់ជំនួយរួមមានថ្នាំអង់ទីប៊ីយោទិច ថ្នាំរំលាយអាហារ ឱសថព្យាបាលជំងឺផ្តាសាយ និងគ្រុនផ្តាសាយ និងឧបករណ៍ថែទាំសុខភាពជាមូលដ្ឋានដូចជា ឧបករណ៍វាស់សម្ពាធឈាម ឧបករណ៍វាស់ជាតិស្ករក្នុងឈាម បង់រុំ និងថ្នាំសម្លាប់មេរោគ។ ការផ្គត់ផ្គង់ក៏មានម៉ាស៊ីនបូមបាញ់មូស និងថ្នាំសម្លាប់សត្វល្អិត ដើម្បីការពារការរីករាលដាលនៃជំងឺនៅក្នុងតំបន់ដែលរងផលប៉ះពាល់។ ទន្ទឹមនឹងនេះកងកម្លាំងកងទ័ពប្រជាជនវៀតណាមបានដាក់ពង្រាយក្រុមរបស់ពួកគេនៅតំបន់ដែលរងគ្រោះ។ គួរបញ្ជាក់ថា អនុសេនីយ៍ឯកនៃនាយកដ្ឋានបង្ការ និងពន្លត់អគ្គីភ័យ ក្រោមក្រសួងកិច្ចការផ្ទៃក្នុងមីយ៉ាន់ម៉ាបាននិយាយថា ក្រុមជួយសង្គ្រោះវៀតណាមបានស្វែងរកយ៉ាងម៉ត់ចត់។ បច្ចុប្បន្នទាំងមីយ៉ាន់ម៉ា និងវៀតណាម កំពុងព្យាយាមស្វែងរកជនរងគ្រោះ មិនថានៅរស់ ឬស្លាប់នោះទេ៕