វិទ្យុជាតិកម្ពុជា៖ មន្ទីរព័ត៌មានខេត្តតាកែវ
តាកែវ៖ ទំនាស់ដ៏រាំរ៉ៃរវាងឈ្មួញទិញដី និងប្រជាពលរដ្ឋ ៤៥គ្រួសារ នៅភូមិឫស្សីមួយគុម្ព ឃុំអូរសារ៉ាយ ស្រុកត្រាំកក់ ខេត្តតាកែវ ដែលអូសបន្លាយរយៈពេលជាង ២ឆ្នាំមកហើយនោះ ត្រូវបាន ឯកឧត្តម វ៉ី សំណាង អភិបាលខេត្តតាកែវ និង មន្រ្តីខុទ្ទកាល័យ ក្រសួងរៀបចំដែនដី នគររូបនីយកម្ម និងសំណង់ បានដឹកនាំកិច្ចប្រជុំ សម្របសម្រួលនិងដោះស្រាយបញ្ចប់ករណីនេះនៅព្រឹកថ្ងៃ ទី ១ ខែ មេសា ឆ្នាំ ២០២៥នេះ នៅសាលា ឃុំអូសារ៉ាយ។
ក្នុងឱកាសនោះឯកឧត្តម វ៉ី សំណាង អភិបាលខេត្តតាកែវ បានលើកឡើងពីការយកចិត្តទុកដាក់ របស់ថ្នាក់ដឹក នាំរាជរដ្ឋាភិបាល ក្រសួងពាក់ព័ន្ធនិងអាជ្ញាធមូលដ្ឋាន ក្នុងការដោះស្រាយរាល់ទុក្ខលំបាក របស់ប្រជាពលរដ្ឋ ជាពិសេសបញ្ហាពាក់ព័ន្ធទៅនិងករណីយ៍ទំនាស់ដីធ្លី ដោយធ្វើយ៉ាងណាស្វែងរកដំណោះស្រាយ អោយបានឆាប់រហ័ស ជូនបងប្អូនប្រជាពលរដ្ឋ។
ឯកឧត្តមអភិបាលខេត្តតាកែវបានលើកឡើងបន្តថា ករណីយសំណើរអន្តរាគមន៍ របស់ប្រជាពលរដ្ឋទាំង ៤៥គ្រួសារ នៅពេលនេះ ត្រូវបានថ្នាក់ដឹកនាំក្រសួងរៀបចំដែនដី និងអាជ្ញាធរខេត្តតាកែវ បានសម្របសម្រួល ធ្វើការដោះ ស្រាយបញ្ចប់ទំនាស់ ដោយភាគីអ្នកទិញប្រគល់ថវិកា ដែលបានព្រមព្រៀងគ្នា ទៅអោយប្រជាពលរដ្ឋ ជា ម្ចាស់ដីទៅតាមទំហំដីដែលមន្រ្តីសូរិយោដីចុះទៅវាស់វែងនៅទីតាំងដោយផ្ទាល់និងដោយចូលរួមពីប្រជាពលរដ្ឋម្ចាស់ដី។
នៅក្នុងឱកាសនោះឯកឧត្តម វ៉ី សំណាង ក៏បានធ្វើការណែនាំដល់មន្រ្តីសូរិយោដី ដែលចុះទៅធ្វើការវាស់វែងដី របស់បងប្អូនប្រជាពលរដ្ឋត្រូវ ធ្វើការប្រកបដោយការទទួលខុសត្រូវខ្ពស់ មានតម្លាភាព និងជៀសវាងដាច់ខាត ការចុះ វាស់វែងដោយលម្អៀង ហើយបើមានបញ្ហាខុសប្រក្រតីកើតឡើង មន្រ្តីដែលប្រព្រឹត្តិខុស នឹងទទួលខុសត្រូវ ចំពោះមុខច្បាប់៕