វិទ្យុជាតិកម្ពុជា៖ លោក រ៉ាត់ សុវណ្ណ (៣០ ០៤ ២០២៥)

ភ្នំពេញ៖ ឯកឧត្តម ពុំ សុថា ប្រធានរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា កត្តាការចូលរួមទាំងអស់គ្នា ពីសំណាក់សមត្ថកិច្ចពាក់ព័ន្ធ និងប្រជាពលរដ្ឋ ធ្វើឱ្យកូនផ្សោតកើតថ្មី៦ក្បាល រស់នៅបានសុខស្រួល មិនស្លាប់ទៅវិញ ។

ឯកឧត្តម ពុំ សុថា ប្រធានរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ក្នុងរយៈពេល៤ខែ ដើមឆ្នាំ២០២៥នេះ កូនផ្សោតកើតបាន៦ក្បាល សរុបទាំងអស់មកដល់ពេលនេះ សត្វផ្សោតមានចំនួន១១០ក្បាលនៅក្នុងប្រទេសកម្ពុជា។
សំឡេង"ហេតុផលដែលផ្សោតមានសេចក្តីសុខ នេះគឺដោយសារអ្វី ដោយសារយើងទាំងអស់គ្នា ដោយសារសមត្ថកិច្ច ប្រជាពលរដ្ឋហ្នឹង គឺគាត់ចូលរួមទាំងអស់គ្នា ហើយផ្សោតប្រសិនយើងមិនរំខានគាត់ គឺគាត់សុខស្រួល ហើយទី១ទៀត គឺទឹករបស់យើង នៅខាងខេត្តក្រចេះ និងស្ទឹងត្រែងនេះ គឺមានគុណភាពល្អ បានន័យថា ជីវ:ចម្រុះអាចរស់បាន ហើយទន្ទឹមនឹងយើងការពារផ្សោត ក៏ដូចជាយើងការពារត្រីមេពូជដែរ  ព្រោះយើងដឹងហើយ នៅក្រចេះ ស្ទឹងត្រែងនេះ នៅផ្នែកខាងលើនេះ គឺប្រភេទត្រីច្រើនណាស់ ដែលជាទីតាំងជម្រករបស់គាត់" ។

បន្ថែមលើនេះ ឯកឧត្តម គូសបញ្ជាក់ថា ប្រទេសកម្ពុជា មានអំណោយផលល្អណាស់ ដោយសារកម្ពុជាមានទាំងសមុទ្រ មានទាំងបឹងទន្លេសាប និងមានទាំងទន្លេ ដែលជាកត្តាអំណោយផលល្អ សម្បូរទៅដោយធនធានធម្មជាតិ ។
សូមរំលឹកថា សព្វថ្ងៃ មានតែប្រទេសចំនួន៦ប៉ុណ្ណោះ ដែលមានវត្តមានផ្សោតទឹកសាបរស់នៅ ហើយកម្ពុជា ជាប្រទេសដែលមានផ្សោតទឹកសាបច្រើនជាងគេ ដែលកំពុងហែលឡើងចុះ តាមខ្សែទឹកដងទន្លេមេគង្គនៅម្តុំព្រែកកាំពី ក្នុងខេត្តក្រចេះ ខណៈដែលនៅពាក់កណ្តាលឆ្នាំ២០២៤ សត្វផ្សោតនៅកម្ពុជា មានប្រមាណ ១០៥ក្បាល៕