ភ្នំពេញ៖បញ្ហាសន្តិសុខសណ្តាប់ធ្នាប់នៅតែជាគោលដៅសំខាន់ដែលត្រូវបានយកចិត្តដាក់នៅផ្លូវថ្មើរជើង «Walk Street »ស្របពេលដែលបងប្អូនប្រជាពលរដ្ឋមានការកើនឡើងជាប្រចាំដោយបានទៅដើរកំសាន្តនៅផ្លូវថ្មើរជើងដោយផ្នែកសន្តិសុខសណ្តាប់ធ្នាប់របៀបរៀបរយសាធារណះត្រូវបានយកចិត្តទុកដាក់ពីរដ្ឋបាលរាជធានីភ្នំពេញ,អាជ្ញាធរដែនដី ពីកងកំលាំងគ្រប់ជំនាញដែលធានាបានថា៖បញ្ហាសន្តិសុខសណ្តាប់ធ្នាប់ ត្រូវបានពង្រឹង នឹងផ្តល់ទំនុកចិត្តដល់បងប្អូនប្រជាពលរដ្ឋទៅលេងកំសាន្តនៅផ្លូវថ្មើរជើងរៀងរាល់ថ្ងៃចុងសប្តាហ៏។
ជាក់ស្ដែងនៅផ្លូវថ្មើរជើងWalk Street នារាត្រីថ្ងៃអាទិត្យទី០៤ ខែឧសភា ឆ្នាំ២០២៥ បងប្អូនប្រជាពលរដ្ឋមកគាំទ្រច្រើនដើរលេងសប្បាយក្រោមម្លប់នៃសន្តិភាព។
គួររំលឹកថា៖ក្នុងកិច្ចប្រជុំដកពិសោធន៏ការអនុវត្តវឌ្ឍនភាពនៅផ្លូវថ្មើរជើងនារសៀលថ្ងៃ ទី៣០មេសា ២០២៥ឯកឧត្តមហួត ហៃ អភិបាលរងរាជធានីភ្នំពេញបានគូសបញ្ជាក់ថា៖  មកដល់ពេលនេះផ្លូវថ្មើរជើងមានអាយុ១២សប្តាហ៏ស្មើនឹងរយះពេល៣ខែមកហើយដែលទទួលបានប្រជាប្រិយ៏ភាពយ៉ាងខ្លាំងពីមួយសប្តាហ៏ទៅមួយសប្តាហ៏ រហូតទទួលបានការកោតសរសើរពីសម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបង្ហាញពីការខិតខំប្រឹងប្រែងអនុវត្តផ្ទាល់ពីឯកឧត្តមឃួង ស្រេង អភិបាលនៃគណៈអភិបាលរាជធានីភ្នំពេញ។ជាពិសេសរាជធានីភ្នំពេញបានជាប់ចំណាក់ថ្នាក់លេខ២លើពិភពលោកឈ្មោះថាជា«ទីក្រុងប្រជុំដោយភាពរីករាយនៅពេលរាត្រី »ដែលបានផ្សាយដោយ Visa 2FLYដកស្រង់ពីSEAInfographicsក្នុងចំណោមរាជធានី និងទីក្រុងនៃបណ្តាប្រទេសជុំវិញពិភពលោកចំនួន១៤។ឯកឧត្តមហួត ហៃ ថ្លែងទៀតថា៖នៅចំណុច ផ្លូវថ្មើរជើងនៅសល់ចំណុចខ្វះខាតខ្លះត្រូវកែលំអរបន្ថែមមានដូចជា ហាមលេង  លោតអន្ទាក់នៅកណ្តាលផ្លូវថ្មើរជើងដើម្បីទុកលទ្ធភាពអោយប្រជាពលរដ្ឋដើរដោយថ្មើរជើងអោយធំទូលាយ។ជាមួយគ្នានេះពាក់ពន្ធ័នឹងបន្ទប់ទឹកនៅតាមផ្លូវថ្មើរជើងឯកឧត្តមអភិបាលរងបន្តថា៖បន្ទប់ទឹកត្រូវតែស្អាតជានិច្ចកុំចាំតែអង្គុយយកតែលុយនៅពេលដែលចំនួនប្រជាពលរដ្ឋចេះតែកើនឡើងពេលត្រូវការបន្ទប់ទឹកសុទ្ធតែតម្រង់ជួរ និងមានក្លិនអាក្រក់។ចំពោះបញ្ហាសន្តិសុខសណ្តាប់ធ្នាប់នៅផ្នែកខាងក្រៅផ្លូវថ្មើរជើងគឺប្រគល់អោយកងកំលាំងជំនាញអ្នកទទួលខុសត្រូវ ។ចំណែកនៅខាងក្នុងគឺប្រគល់ជូនសណ្តាប់ធ្នាប់ខណ្ឌដូនពេញទទួលខុសត្រូវ។យើងទាំងអស់គ្នាខិតខំរក្សាតំណែងលេខ២នេះ នឹងឈានទៅដណ្តើមយកលេខ១បន្តទៀត ម៉្យាងទៀតកុំទុកឲ្យរឿងកំតូចតាចដូចជាចោរកម្មនៅលើដងផ្លូវថ្មើរជើងដែលបណ្តាលឲ្យខូចប្រយោជន៏ធំ និងប៉ះពាល់ដល់កិត្តិយសដែលយើងខិតខំធ្វើ និងទទួលបានជោគជ័យរហូតមកដល់ពេលនេះ៕