វិទ្យុជាតិកម្ពុជា៖

នៅក្នុងជំនួបពិភាក្សាទ្វេភាគីជាមួយលោកជំទាវ Teo Nie Ching អនុរដ្ឋមន្ត្រីក្រសួងទំនាក់ទំនាក់នៃប្រទេសម៉ាឡេស៊ី ក្នុងឱកាសចូលរួមកិច្ចប្រជុំរដ្ឋមន្ត្រីព័ត៌មានអាស៊ាននាថ្ងៃទី៧ ខែឧសភា ឆ្នាំ២០២៥ នៅប្រទេសព្រុយណេ ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មានកម្ពុជា បានចែករំលែកបទពិសោធរបស់កម្ពុជា និងសារៈសំខាន់នៃការរៀបចំរបាយការណ៍វាយតម្លៃអំពីស្ថានភាពសេរីភាពសារព័ត៌មាននៅក្នុងប្រទេសកម្ពុជា។ ឯកឧត្តមរដ្ឋមន្រ្តី បានគូសបញ្ជាក់ថា កម្ពុជាត្រៀមខ្លួនរួចជាស្រេចក្នុងការចែករំលែកបទពិសោធលើការរៀបចំរបាយការណ៍ស្តីពីស្ថានភាពសេរីភាពសារព័ត៌មានដល់សមាជិកអាស៊ានផ្សេងទៀត ដើម្បីបង្ហាញពីបរិស្ថានបច្ចុប្បន្ន និងលំហសេរីភាពសារព័ត៌មានក្នុងបណ្តាប្រទេសរៀងៗខ្លួន។ 

 

ភាគីទាំងពីរបានកត់សម្គាល់ពីការវិវត្តយ៉ាងឆាប់រហ័សនៃការទំនាក់ទំនងតាមបែបឌីជីថល និងបានឯកភាពរួមគ្នាលើតម្រូវការគោលនយោបាយដើម្បីគ្រប់គ្រងប្រព័ន្ធផ្សព្វផ្សាយសង្គម និងមាតិកាអនឡាញ ដោយសារការរីករាលដាលនៃព័ត៌មានក្លែងក្លាយ និងបញ្ហាទំនុកចិត្តរបស់សាធារណជនលើប្រព័ន្ធផ្សព្វផ្សាយនាពេលបច្ចុប្បន្ន។

 

ម៉ាឡេស៊ីស្វាគមន៍ចំពោះសំណើរបស់កម្ពុជាសម្រាប់កិច្ចសហប្រតិបត្តិការទូលំទូលាយក្នុងការអភិវឌ្ឍប្រព័ន្ធផ្សព្វផ្សាយ និងការកសាងសមត្ថភាព ហើយភាគីទាំងពីរបានសន្យាចុះហត្ថលេខាលើអនុស្សរណៈយោគយល់នៅពេលខាងមុខ និងបន្តការពិគ្រោះយោបល់បច្ចេកទេសដើម្បីអនុវត្តគម្រោងរួមគ្នា។