វិទ្យុជាតិកម្ពុជា៖លោក ជួន បូណា ០៨ ០៥ ២៥
ទីម័រឡេស្តេ៖ប្រធានាធិបតីទីម័រឡេស្តេ ថ្លែងអំណរគុណចំពោះការជ្រោមជ្រែងរបស់សម្ដេចតេជោ ក្នុងការជួយទីម័រឡេស្តេ ក្លាយជាសមាជិកពេញសិទ្ធិរបស់អាស៊ាននៅពេលខាងមុខ ខណៈដែលកម្ពុជាគឺជាមិត្តដ៏ល្អ ជាមិត្តដ៏អស្ចារ្យរបស់ទីម័រឡេស្តេ ។នេះបើតាមការបញ្ជាក់របស់ឯកឧត្តម ជា ធីរិទ្ធិ អ្នកនាំពាក្យព្រឹទ្ធសភា ក្រោយជំនួបពិភាក្សាការងារជាមួយសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជានិងឯកឧត្ដម José Ramos-Horta ប្រធានាធិបតីនៃសាធារណរដ្ឋប្រជាធិបតេយ្យទីម័រឡេស្តេ នៅវិមានប្រធានាធិបតីទីម័រឡេស្តេ ទីក្រុងឌីលី នៅថ្ងៃទី៨ ខែឧសភា ឆ្នាំ២០២៥ ។

ឯកឧត្តម ជា ធីរិទ្ធិ អ្នកនាំពាក្យព្រឹទ្ធសភា បានបញ្ជាក់ថា ឯកឧត្តមប្រធានាធិបតីទីម័រឡេស្តេបានជម្រាបជូនសម្ដេចតេជោថា ប្រជាជននិងរដ្ឋាភិបាលទីម័រឡេស្តេ ក៏ដូចជាឯកឧត្តមផ្ទាល់ គឺមានកិត្តិយសឧត្តុង្គឧត្តម និងមានមោទនភាព ដែលបានទទួលនូវវត្តមានដ៏ខ្ពង់ខ្ពស់របស់សម្ដេចតេជោ ហ៊ុន សែន និងគណៈប្រតិភូអញ្ជើញមកកាន់ទីម័រឡេស្តេ នៅក្នុងឱកាសនេះ។ ឯកឧត្តមបានបញ្ជាក់ថា ទីម័រឡេស្តេ គឺជាមិត្តដ៏ល្អ ជាមិត្តដ៏អស្ចារ្យរបស់កម្ពុជា។ 
ឯកឧត្តមបានអរគុណចំពោះសម្ដេចតេជោ ដែលបានខិតខំប្រឹងប្រែងជ្រោមជ្រែងដល់ប្រទេសទីម័រឡេស្តេ និងបានចូលរួមចំណែកឱ្យទីម័រឡេស្តេ អាចក្លាយទៅជាសមាជិកសង្កេតការណ៍របស់អាស៊ាន កាលពីឆ្នាំ ២០២២ នៅពេលដែលកម្ពុជាធ្វើជាប្រធានប្ដូរវេនអាស៊ាន និងការជ្រោមជ្រែងរបស់សម្ដេចតេជោ ក្នុងការជួយទីម័រឡេស្តេ ក្លាយជាសមាជិកពេញសិទ្ធិរបស់អាស៊ាននៅពេលខាងមុខ។
ទន្ទឹមនេះឯកឧត្តមកោតសរសើរពីឥស្សរភាព របស់សម្ដេចតេជោ ដែលឯកឧត្តមចាត់ទុកសម្ដេចតេជោ គឺជាឥស្សរជនដ៏មានឥទ្ធិពលបំផុត នៅក្នុងតំបន់អាស៊ីអាគ្នេយ៍ មិនតែប៉ុណ្ណោះ ឯកឧត្តមប្រធានាធិបតី ក៏បានរំលេចអំពីការពលីកម្មរបស់សម្ដេចតេជោ ក្នុងបុព្វហេតុដើម្បីកម្ពុជា។ ឯកឧត្តមបានហៅសម្ដេចតេជោថាគឺជាអ្នករំដោះកម្ពុជាចេញពីរបបប្រល័យពូជសាសន៍ និងជាស្ថាបនិកកម្ពុជានៅក្នុងសម័យទំនើប។ ឯកឧត្តមប្រធានាធិបតីក៏បានរំលេចនូវការដឹងគុណជាថ្មីម្ដងទៀតចំពោះសម្ដេចតេជោដែលបានជួយជ្រោមជ្រែងទីម័រឡេស្តេ ហើយសង្ឃឹមថាទីម័រឡេស្តេនឹងអាចចូលជាសមាជិកអាស៊ានពេញសិទ្ធិនៅក្នុងពេលខាងមុខដ៏ឆាប់។ 
 ក្នុងជំនួបនោះសម្ដេចតេជោហ៊ុន សែន បានបង្ហាញនូវក្តី រំភើបយ៉ាងក្រៃលែងចំពោះការទទួលបដិសណ្ឋារកិច្ចដ៏អស្ចារ្យ ពីសំណាក់  ភាគីទីម័រឡេស្តេ នៅក្នុងឱកាសសម្ដេចអញ្ជើញបំពេញទស្សនកិច្ចផ្លូវការនៅប្រទេសទីម័រឡេស្តេ។ 
សម្ដេចតេជោបានបញ្ជាក់ថា ការទទួលគណៈប្រតិភូក្នុងទម្រង់បែបនេះមិនអាចធ្វើទៅបានឡើយប្រសិនបើទំនាក់ទំនងប្រទេសទាំងពីរមិនរឹងមាំ និងមិនល្អប្រសើរទេនោះ។ សម្តេចតេជោ ក៏បានរំលេចបន្ថែមអំពីការពង្រឹងចំណងមិត្តភាព រវាងកម្ពុជានិងទីម័រឡេស្តេបន្តទៀត ខណៈប្រទេសទាំងពីរបានបង្កើតទំនាក់ទំនងការទូតជាផ្លូវការជាមួយគ្នា អស់រយៈពេលជាង ២៣ឆ្នាំមកហើយ ពោលគឺចាប់តាំងពីឆ្នាំ២០០២ កន្លងមក។ សម្ដេចតេជោសង្ឃឹមថាភាគីទាំងពីរ និងរួមគ្នាពង្រីកទំនាក់ទំនងទ្វេភាគីបន្ថែមទៀត។
នៅក្នុងកាលនោះ សម្ដេចតេជោក៏បង្ហាញនូវក្តីសង្ឃឹមផងដែរថា ទីម័រឡេស្តេនឹងអាចចូលជាសមាជិក អាស៊ានពេញសិទ្ធិ នៅពេលខាងមុខ។ សម្ដេចបានរំលេចអំពីការខិតខំប្រឹងប្រែង ជាពិសេសគឺជំហររបស់កម្ពុជា ក្នុងការគាំទ្រទីម័រឡេស្តេ ដើម្បីក្លាយជាសមាជិកពេញសិទ្ធិរបស់អាស៊ាន។ សម្ដេចក៏រំលេចការប្រៀបធៀបពីទីម័រឡេស្តេក្នុងពេលបច្ចុប្បន្ន និងស្ថានភាពកម្ពុជា កាលពីមុនចូលអាស៊ាន ១៩៩៩នោះ គឺ GDP របស់កម្ពុជាមានត្រឹមតែ២៨១ដុល្លារទេ ប៉ុន្តែស្ថានភាពGDP របស់ទីម័រនៅពេលនេះ មានរហូតដល់១៤៥៣ដុល្លារ ដែលបើប្រៀបធៀបស្ថានភាពកម្ពុជា និងទីម័រគឺខុសគ្នាឆ្ងាយណាស់ ដែលនេះវាសក្តិសមណាស់នៅក្នុងស្ថានភាពដែលទីម័រឡេស្តេអាចចូលជាសមាជិកពេញសិទ្ធិអាស៊ានបាន។ 
នៅចុងក្រោយនៃជំនួបភាគីទាំងពីរ បានផ្លាស់ប្ដូរទស្សនៈគ្នាពីបញ្ហាតំបន់និងពិភពលោកដែលកំពុងកើតមានផងដែរ។ សម្ដេចតេជោក៏បាននាំយកនូវការអញ្ជើញរបស់ព្រះករុណា ព្រះមហាក្សត្រនៃព្រះរាជាណាចក្រកម្ពុជា ចំពោះលោកប្រធានាធិបតីទីម័រឡេស្តេ អញ្ជើញទៅបំពេញទស្សនកិច្ចផ្លូវរដ្ឋ នៅកម្ពុជានៅពេលសមស្របណាមួយ៕