មហាសេដ្ឋីDeripaskaបង្ហាញការសង្ស័យលើដំណើរស្វែងរករបស់រុស្ស៊ីសម្រាប់ "ជ័យជំនះ" នៅអ៊ុយក្រែន

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ មហាសេដ្ឋីរុស្ស៊ីលោក Oleg Deripaska បានឲ្យយោបល់កាលពីថ្ងៃអង្គារថា គ្មានអ្នកឈ្នះណាមួយនឹងចេញពីការលុកលុយរបស់ទីក្រុងម៉ូស្គូលើអ៊ុយក្រែននោះទេ ហើយបានគូសបញ្ជាក់ពីតម្លៃសេដ្ឋកិច្ចដែលរុស្ស៊ីកំពុងចំណាយសម្រាប់សកម្មភាព របស់ខ្លួន។ នេះបើយោងតាមការចេញផ្សាយដោយសារព័ត៌មាន Reuters។ ការអត្ថាធិប្បាយរបស់លោកDeripaska ទៅកាន់អ្នកសារព័ត៌មាននៅទីក្រុងម៉ូស្គូ គឺតំណាងឱ្យការចោទសួរជាសាធារណៈដ៏កម្ររបស់មហាសេដ្ឋីរុស្ស៊ី អំពីហេតុផលរបស់វិមានក្រឹមឡាំងចំពោះសង្គ្រាម។ លោកបានថ្លែងដោយប្រុងប្រយ័ត្នបំផុត ដើម្បីចៀសវាងការរិះគន់លោកប្រធានាធិបតី វ្ល៉ាឌីមៀ ពូទីន ដោយផ្ទាល់។ លោក Deripaska បាននិយាយថា "លោកមានការព្រួយបារម្ភថា ពួកយើងបោះបង់អ្វីៗគ្រប់យ៉ាងដែល បានសម្រេចផ្នែកសេដ្ឋកិច្ចយ៉ាងឆាប់រហ័សក្នុងទសវត្សរ៍ទី៩០ បន្ទាប់មកយើងបោះបង់ចោលនូវអ្វីគ្រប់យ៉ាងដែលយើងសម្រេចបានក្នុងទសវត្សរ៍ឆ្នាំ ២០០០ ហើយឥឡូវនេះយើងកំពុងអង្គុយរង់ចាំជ័យជំនះ។ ជ័យជំនះរបស់អ្នកណា?" លោកបានបន្ថែមថា “ខ្ញុំគិតថាការបំផ្លាញអ៊ុយក្រែននឹងជាកំហុសដ៏ធំមួយរួមទាំងយើងផងដែរ។” លោកបាននិយាយថាការកើនឡើងនៃកម្រិតវិបុលភាពត្រូវបានផ្សារភ្ជាប់ទៅនឹងការអភិវឌ្ឍន៍នៃវិស័យឯកជនរបស់រុស្ស៊ីនិងការកសាងទំនាក់ទំនងជាមួយប្រទេសដទៃទៀតនៃអឺរ៉ុបដែលជាដៃគូសេដ្ឋកិច្ចដ៏សំខាន់របស់រុស្ស៊ី។ លោក Deripaska ស្ថាបនិកក្រុមហ៊ុនអាលុយមីញ៉ូមយក្សរុស្ស៊ី Rusal (RUAL.MM) បាននិយាយថា ប៉ុន្តែវា "ជាក់ស្តែង" ដែលទណ្ឌកម្មរបស់លោកខាងលិចឥឡូវនេះ កំពុងធ្វើឱ្យប៉ះពាល់ដល់ប្រទេសរុស្ស៊ីច្រើនជាងអឺរ៉ុប។ លោកDeripaska ដែលខ្លួនគាត់ផ្ទាល់ស្ថិតនៅក្រោមការដាក់ទណ្ឌកម្មពីសហរដ្ឋអាមេរិក អង់គ្លេស និងសហភាពអឺរ៉ុប បាន និយាយថា ទោះបីជាយ៉ាងណា ក៏ដោយ លោកបានប៉ាន់ស្មានថាតើសេដ្ឋកិច្ចរបស់រុស្ស៊ីនឹងមានស្ថិរភាពយ៉ាងណា?៕