ក្នុងរយៈ ពេល៩ ខែក្នុងឆ្នាំ២០២៣ ការមកដល់របស់ភ្ញៀវទេសចរបរទេសក្នុងប្រទេសឡាវ មានការកើនឡើង

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ យោងតាមរបាយការណ៍ចុងក្រោយរបស់ក្រសួងព័ត៌មាន វប្បធម៌ និងទេសចរណ៍ឡាវបានឱ្យ ដឹងថា ភ្ញៀវទេសចរបរទេសជាង ២,៤ លាននាក់បានចំណាយពេលនៅក្នុងប្រទេសឡាវ ក្នុងរយៈពេល ៩ ខែដំបូងនៃឆ្នាំ ២០២៣ កើនឡើង២៨៥ ភាគរយ បើធៀបនឹងរយៈពេលដូចគ្នាក្នុងឆ្នាំ ២០២២។ នេះបើតាមការចេញផ្សាយដោយសារព័ត៌មាន Xinhua។ ស្ថិតិចងក្រងដោយក្រសួងបានបង្ហាញថា ភ្ញៀវទេសចរជាង ១,៦ លាននាក់បានមកពីបណ្តាប្រទេសអាស៊ាន ខណៈ ៦៣៦,៦៨៧ នាក់មកពីតំបន់ អាស៊ីប៉ាស៊ីហ្វិក ១៤២,៨៤៥ មកពីអឺរ៉ុប និង ៥៤,៦៨៦ មកពីសហរដ្ឋអាមេរិក។ តួលេខបានបង្ហាញថា មនុស្សកាន់តែច្រើនឡើងបានទៅកាន់ប្រទេសឡាវ ដោយសារឥឡូវនេះ វាមានភាពងាយស្រួលក្នុងការធ្វើ ដំណើរ ដោយមានការសម្របសម្រួលដោយការធ្វើដំណើរលឿនជាងមុននៅលើផ្លូវហាយវ៉េ និងផ្លូវដែកចិន-ឡាវ។ រដ្ឋាភិបាលឡាវ និងធុរកិច្ចក្នុងស្រុកបានរួមកម្លាំងគ្នាដើម្បីលើកកម្ពស់ វិស័យទេសចរណ៍ និងទទួល បានទស្សនិកជនកាន់តែច្រើនតាមរយៈការតាំងពិព័រណ៍អន្តរជាតិ ពិព័រណ៍ទេសចរណ៍អាស៊ាន និងការ អភិវឌ្ឍន៍ផលិតផលទេសចរណ៍ថ្មីៗ។ រដ្ឋាភិបាលសង្ឃឹមថា យ៉ាងហោចណាស់មានភ្ញៀវទេសចរបរទេស និង ឡាវ ចំនួន  ៤,៦  លាន នាក់ នឹង ធ្វើ ដំណើរ ទៅ ប្រទេស ឡាវ នៅ ឆ្នាំ ក្រោយ ដែល អាច រក ចំណូល បាន  ៧១២  លាន ដុល្លារ អាមេរិក៕