ភ្ញៀវក្នុងស្រុករបស់ប្រទេសម៉ាឡេស៊ីកើនឡើងជាង ២៤ ភាគរយនៅក្នុងត្រីមាសទី ៣

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ ទិន្នន័យផ្លូវការបានបង្ហាញថា ប្រទេសម៉ាឡេស៊ីបានកត់ត្រាភ្ញៀវទេសចរក្នុងស្រុកចំនួន ៤៣,៤ លាននាក់នៅក្នុងត្រីមាសទីបីក្នុងឆ្នាំនេះ កើនឡើង ២៤,៣ ភាគរយបើធៀបនឹងត្រីមាសដូចគ្នាកាលពីឆ្នាំមុន។ នេះបើយោងតាមការចេញផ្សាយដោយសារព័ត៌មាន Xinhua។ នាយកដ្ឋានស្ថិតិម៉ាឡេស៊ីបាននិយាយនៅក្នុងសេចក្តីថ្លែងការណ៍មួយថា ទោះបីជាយ៉ាងណាក៏ដោយ សម្រាប់ការប្រៀបធៀបមួយត្រីមាសទៅមួយត្រីមាស ភ្ញៀវទេសចរក្នុងស្រុកបានថយចុះ ២ ភាគរយបើធៀបនឹងត្រីមាសទីពីរ។ សម្រាប់ការចំណាយទេសចរណ៍ក្នុងស្រុកបានចុះបញ្ជី ២០,១ ពាន់លានរីងហ្គីត (៤,២៩ ពាន់លានដុល្លារអាមេរិក) កើនឡើង ៣៣,៨ ភាគរយពីមួយឆ្នាំទៅមួយឆ្នាំ ប៉ុន្តែធ្លាក់ចុះ ៨,៣ ភាគរយសម្រាប់ការប្រៀបធៀបប្រចាំត្រីមាស។ សរុបមក ប្រទេសម៉ាឡេស៊ីបានកត់ត្រាភ្ញៀវទេសចរក្នុងស្រុកចំនួន ១៥៦,៦ លាននាក់រហូតដល់ខែកញ្ញា ២០២៣ កើនឡើង ២៥,៤ ភាគរយបើធៀបនឹងឆ្នាំមុន។ ចំពោះការចំណាយរបស់ទេសចរណ៍ក្នុងស្រុកសម្រាប់រយៈពេលប្រាំបួនខែដំបូង បានចុះបញ្ជី ៦១,២ ពាន់លានរីងហ្គីត កើនឡើង ៣៣,៨ ភាគរយបើធៀបនឹងឆ្នាំមុន៕ (១ រីងហ្គីត ស្មើនឹង ០,២១ ដុល្លារអាមេរិក)