ធនាគារពិភពលោកបញ្ចេញថវិកាចំនួន ២៥០ លានដុល្លារដល់ស្រីលង្កាដែលជាជំនួយទីពីរ

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ ធនាគារពិភពលោកបាននិយាយថា ខ្លួនបានបញ្ចេញទឹកប្រាក់ចំនួន ២៥០ លានដុល្លារអាមេរិកជាជំនួយទីពីរនៃប្រតិបត្តិការគោលនយោបាយអភិវឌ្ឍន៍ភាពធន់ ស្ថិរភាព និងសេដ្ឋកិច្ច ដល់ប្រទេសស្រីលង្កា(RESET)។ នេះបើយោងតាមការចេញផ្សាយដោយសារព័ត៌មាន Xinhua។ កាលពីខែមិថុនា ធនាគារពិភព លោកបានប្រកាសផ្តល់ប្រាក់ចំនួន ៥០០ លានដុល្លារសម្រាប់ប្រតិបត្តិការគោលនយោបាយអភិវឌ្ឍន៍ RESET ដែលគាំទ្រដល់កំណែទម្រង់ដែលធ្វើឲ្យប្រសើរឡើងនូវអភិបាលកិច្ចសេដ្ឋកិច្ច លើកកម្ពស់កំណើន និងការប្រកួតប្រជែង ការពារជនក្រីក្រ និងជនងាយរងគ្រោះ។ ធនាគារពិភពលោកបាននិយាយនៅក្នុងសេចក្តីថ្លែងការណ៍មួយថានៅក្នុងខែនេះគឺមានទឹកប្រាក់ចំនួន ២៥០ លានដុល្លារត្រូវបានបញ្ចេញ។ ធនាគារពិភពលោកបាននិយាយថា ជំនួយទីពីរឥឡូវនេះត្រូវបានចេញផ្សាយបន្ទាប់ពីការវាយតម្លៃថារដ្ឋាភិបាលស្រីលង្កានៅតែបន្តធ្វើឱ្យមានវឌ្ឍនភាពគួរឱ្យពេញចិត្តក្នុងការអនុវត្តកម្មវិធីកំណែទម្រង់ទូលំទូលាយ។ លោក Faris H. Hadad-Zervos នាយកធនាគារពិភពលោកប្រចាំប្រទេសម៉ាល់ឌីវ នេប៉ាល់ និងស្រីលង្កាបាននិយាយថា សន្ទុះបន្តលើកំណែទម្រង់សេដ្ឋកិច្ច និងរចនាសម្ព័ន្ធមានសារៈសំខាន់ មិនត្រឹមតែសម្រាប់ស្ថិរភាពសេដ្ឋកិច្ចប៉ុណ្ណោះទេ ប៉ុន្តែថែមទាំងបញ្ចេញសក្តានុពលរបស់ខ្លួនសម្រាប់កំណើន និងការផ្លាស់ប្តូរដែលដឹកនាំដោយវិស័យឯកជនផងដែរ៕