ក្នុងរយៈពេល ​១១​ ខែ​នៃ​ឆ្នាំ​ ២០២៣ ភ្ញៀវ​ទេសចរ​បរទេស​មក​កាន់ប្រទេសឥណ្ឌូនេស៊ី​កើន​លើស​ពី ១០ ​លាន​នាក់​

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ ស្ថិតិឥណ្ឌូនេស៊ី (BPS) បានប្រកាសថា ប្រទេសឥណ្ឌូនេស៊ីទទួលបានភ្ញៀវទេសចរបរទេសជាង ១០,៤ លាននាក់ក្នុងរយៈពេល ១១ ខែនៃឆ្នាំ ២០២៣ កើនឡើង ១១០,៨ ភាគរយបើធៀបនឹងរយៈពេលដូចគ្នាក្នុងឆ្នាំ ២០២២។ នេះបើយោងតាមការចេញផ្សាយដោយសារព័ត៌មាន Xinhua។ លោក Amalia Adininggar Widyasanti ដែលជាប្រធានស្តីទី BPS បានប្រាប់សន្និសីទសារព័ត៌មានថា នៅក្នុងខែវិច្ឆិកាប្រទេសឥណ្ឌូនេស៊ីបានទទួលភ្ញៀវទេសចរបរទេសចំនួន ៩១៧,៤១០ នាក់ដែលឆ្លុះបញ្ចាំងពីកំណើន ៣០,១៧ ភាគរយពីមួយឆ្នាំទៅមួយឆ្នាំ។ ទោះជាយ៉ាងណាក៏ដោយ ចំនួននេះតំណាងឱ្យការធ្លាក់ចុះ ៦,២៤ ភាគរយបើធៀបនឹងខែតុលា ឆ្នាំ ២០២៣។ លោក Widyasanti បាននិយាយថា "ការមកដល់របស់ភ្ញៀវទេសចរបរទេសនៅក្នុងខែវិច្ឆិកាត្រូវបានគ្របដណ្តប់ដោយភ្ញៀវទេសចរមកពីប្រទេសម៉ាឡេស៊ី (១៥,៤៥ ភាគរយ) សិង្ហបុរី (១២,៨៦%) និងអូស្ត្រាលី (១២,៧៦%)៕