វិទ្យុជាតិកម្ពុជា កញ្ញា ខៀវ ណាវីន
អន្តរជាតិ៖ ទីភ្នាក់ងារសារព័ត៌មានវៀតណាមបានរាយការណ៍ដោយដកស្រង់សម្តីរបស់ក្រសួងកសិកម្ម និងអភិវឌ្ឍន៍ជនបទថា ទំហំ និងតម្លៃនាំចេញអង្កររបស់ប្រទេសវៀតណាម បានឡើងដល់កម្រិតខ្ពស់បំផុតគ្រប់ពេលគឺ ៨,៣ លានតោន និង ៤,៧៨ ពាន់លានដុល្លារអាមេរិកក្នុងឆ្នាំ ២០២៣។ នេះបើយោងតាមការចេញផ្សាយដោយសារព័ត៌មាន Xinhua។ យោងតាមក្រសួង តម្លៃនាំចេញរបស់វៀតណាមជាមធ្យមគឺ ៦៦៣ ដុល្លារក្នុងមួយតោន ជាលទ្ធផលនៃតម្រូវការខ្ពស់។ ក្រសួងកសិកម្មបាននិយាយថា ទិន្នផលស្រូវសរុបនៅក្នុងប្រទេសបានកើនឡើង ១,៩ ភាគរយដល់ ៤៣,៥ លានតោន ដោយសារការបង្កើនផ្ទៃដីកសិកម្ម និងផលិតភាព ដែលឆ្លើយតបទាំងតម្រូវការក្នុង ស្រុក និងការនាំចេញ។ ក្រុមអ្នកនាំចេញអង្ករបាននិយាយថា ខណៈ ដែលការផ្គត់ផ្គង់ពិភពលោកនៅតែមានកម្រិតទាប តម្រូវការអង្ករវៀតណាមនឹងកើនឡើងនៅឆ្នាំ ២០២៤ ជាពិសេសពីប្រទេសហ្វីលីពីន និងប្រទេសចិន។ វៀតណាមកំណត់គោលដៅផលិតអង្ករពី ៤៣ ទៅ ៤៣,៥ លានតោនក្នុងឆ្នាំ ២០២៤ នេះ។ ប្រព័ន្ធផ្សព្វផ្សាយក្នុងស្រុកបានរាយការណ៍ថា ការនាំចេញអង្ករត្រូវបានគេព្យាករថានឹងនាំមកនូវប្រាក់ ៥,៣ ពាន់លានដុល្លារដល់ប្រទេសជាតិក្នុងឆ្នាំនេះ៕
Comments