ក្នុង ខែ កុម្ភៈ អតិរេក សមតុល្យ ពាណិជ្ជកម្ម របស់ ប្រទេស ឥណ្ឌូនេស៊ី បាន ធ្លាក់ ចុះ មក ត្រឹម ០,៨៧ ពាន់ លាន ដុល្លារ

វិទ្យុជាតិកម្ពុជា កញ្ញា ខៀវ ណាវីន 

អន្តរជាតិ៖ បើ តាម ស្ថិតិ ឥណ្ឌូនេស៊ី (BPS) បាន ប្រកាសថា  ក្នុង ខែកុម្ភៈ អតិរេកសមតុល្យ ពាណិជ្ជកម្ម របស់ ប្រទេស ឥណ្ឌូនេស៊ី បាន ធ្លាក់ ចុះ មក នៅ ត្រឹម ០,៨៧ ពាន់ លាន ដុល្លារ  ។ នេះបើយោងតាមការចេញផ្សាយដោយសារព័ត៍មាន Xinhua។ លោកស្រី Amalia Widyasanti ប្រធានស្តីទីនៃ BPS បាននិយាយថា តួលេខនេះគឺទាបជាងអតិរេកកាលពីខែមករាដែលមានចំនួន ២,០២ ពាន់លានដុល្លារ និងខែដូចគ្នាកាលពីឆ្នាំមុនដែលមានចំនួន ៥,៤៨ ពាន់លានដុល្លារ។ លោកស្រីបាននិយាយនៅក្នុងសន្និសីទសារព័ត៌មានថា "នេះគឺជាខែទី ៤៦ ជាប់ៗគ្នានៃអតិរេក ប៉ុន្តែវាទាបជាងបន្តិចបើប្រៀបធៀបទៅនឹងខែមករា"។ ទំនិញមិនមែនប្រេង និងឧស្ម័ន ដូចជាឥន្ធនៈរ៉ែ ខ្លាញ់ ប្រេងបន្លែ និងដែកបានរួមចំណែក ២,៦៣ ពាន់លានដុល្លារ ប៉ុន្តែតួលេខអតិរេកបានធ្លាក់ចុះយ៉ាងខ្លាំងដោយសារតែឱនភាពនៃទំនិញប្រេង និងឧស្ម័ន។ ទន្ទឹមនឹងនេះតម្លៃនៃការនាំចេញមានចំនួន ១៩,៣១ ពាន់លានដុល្លារធ្លាក់ចុះ ៨,៣៤ ភាគរយ ហើយតម្លៃនៃការនាំចូលមានចំនួន ១៨,៤៤ ពាន់លានដុល្លារ ដែលធ្លាក់ចុះ ០,២៩ ភាគរយបើធៀបនឹងខែមករា កើនឡើង ១៥,៨៤ ភាគរយបើធៀបនឹងរយៈពេលដូចគ្នាក្នុងឆ្នាំមុន៕