សហគ្រាសធុនតូច និងមធ្យម នឹងកាន់តែងាយស្រួលក្នុងការចុះបញ្ជីទៅក្នុងប្រព័ន្ធឆាប់ៗនេះ

Mar 25, 2024 ព័ត៌មានជាតិ

វិទ្យុជាតិកម្ពុជា៖លោក ជួន បូណា ២៥ ០៣ ២៤

a14-34

a7-53

a8-50

a9-43

a10-42

a11-39

a12-39

a13-34

ភ្នំពេញ៖ រដ្ឋមន្រ្តីក្រសួងឧស្សាហកម្ម បានប្រកាសថា សហគ្រាសធុនតូច និងមធ្យម នឹងកាន់តែងាយស្រួលក្នុងការចុះបញ្ជីទៅក្នុងប្រព័ន្ធឆាប់ៗនេះហើយ ដើម្បីធ្វើយ៉ាងណាឲ្យសហគ្រាសទាំងអស់ចំណេញទាំងពេលវេលា និងថវិកា។

ថ្លែងប្រាប់អ្នកសារព័ត៌មានក្នុងសន្និសីទសារព័តមាន ក្នុងពិធីបើកទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍» លើកទី២ ក្រោមប្រធានបទ « សហគ្រាសធុនតូច និងមធ្យម ឆ្ពោះទៅវិទ្យាសាស្ត្រ បច្ចេកវិទ្យា និងនវានុវត្តន៍ »កាលពីថ្ងៃទី២៤ ខែមីនា ឆ្នាំ២០២៤ ឯកឧត្ដម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានប្រសាសន៍ថា ក្រសួងកំពុងតែរៀបចំនូវការផ្តល់សេវាសាធារណៈរបស់ក្រសួង តាមរយៈអនឡាញ ដើម្បីជំរុញការផ្តល់សេវាឱ្យកាន់តែលឿន និងឆ្លើយតប ទៅនឹងគោលនយោបាយរាជរដ្ឋាភិបាលកម្ពុជា ជារដ្ឋាភិបាលឌីជីថល។
ឯកឧត្ដមបានបញ្ជាក់ថា ការផ្តល់សេវាសាធារណៈតាមរយៈអនឡាញនេះ ដើម្បីបង្កលក្ខណៈងាយស្រួលដល់ប្រជាពលរដ្ឋក្នុងការទទួលបានសេវាសាធារណៈតាមអនឡាញ ដោយមិនពិបាកមកស្នើសុំ ដាក់ពាក្យ និងប្រើប្រាស់ក្រដាសដូចមុនទៀតហើយ ។
ឯកឧត្តម ហែម វណ្ណឌី បានបន្ថែមថា តួនាទីនៃវិទ្យាសាស្ត្រ បច្ចេកវិទ្យា និងនវានុវត្តន៍ គឺជាកត្តាលីករ ដើម្បីជំរុញការសម្រេចបាននូវចក្ខុវិស័យ ២០៣០ និង ២០៥០ របស់កម្ពុជា ។
«នៅក្នុងប៉ុន្មានឆ្នាំខាងមុខនេះបងប្អូនប្រហែលជាលែងមានជម្រើសមកសុំដាក់ពាក្យស្នើសុំទៀតហើយ សូម្បីតែបែបបទគយអីនេះ ក៏ឈានទៅប្រព័ន្ធ អាស៊ីកូដា ប្រព័ន្ធស៊ីងហ្កលវីនដូរដែរ ពីព្រោះយើងត្រូវការធ្វើការជាមួយបណ្តាប្រទេសផ្សេងៗ។ ប្រទេសគេ គេលែងប្រើក្រដាស គេលែងប្រើមនុស្សរត់ការអីហើយ គឺគេប្រើប្រព័ន្ធអូតូមេសិនទាំងអស់។ អ៊ីចឹងយើងក៏ត្រូវទៅតាមហ្នឹង»។
ជាមួយគ្នា ឯកឧត្ដមរដ្ឋមន្រ្តីក្រសួងឧស្សាហកម្មបានបញ្ជាក់ថា ហេតុដូច្នេះហើយបានជាទិវាជាតិ វិទ្យាសាស្ត្រ បច្ចេកវិទ្យា និងនវានុវត្តន៍» លើកទី២នេះ ក្រសួងបានខិតខំប្រមូលផ្តុំSME ដើម្បីឱ្យពួកគេយល់ច្បាស់អំពីវឌ្ឍនភាពនៃការជំរុញវិស័យឌីជីថលនេះឱ្យកាន់តែមានប្រសិទ្ធភាព។
ឯកឧត្ដម ហែម វណ្ណឌី ក៏បានអំពាវនាវដល់ម្ចាស់អាជីវកម្ម និងដៃគូអភិវឌ្ឍន៍ ព្រមទាំងភាគីពាក់ព័ន្ធទាំងអស់ ខិតខំចាប់យកឱកាស សិក្សាស្វែងយល់រៀនសូត្រ សហការបង្កើតនូវនវានុវត្ដថ្មីៗ។
ក្នុងឱកាសនោះ ឯកឧត្ដមរដ្ឋមន្រ្តីរំពឹងថា ទិវាជាតិ វិទ្យាសាស្ត្រ បច្ចេកវិទ្យា និងនវានុវត្តន៍នេះ នឹងអាចទាក់ទាញមនុស្សចូលរួមប្រមាណ៣ម៉ឺននាក់ និងក្រុមហ៊ុន ចំនួន១៣២បានចូលរួមក្នុងរយៈពេល៣ថ្ងៃនេះ។
សូមបញ្ជាក់ថា បើតាមឯកឧត្ដមរដ្ឋមន្រ្តី នៅក្នុងចំណោមអង្គភាព សេដ្ឋកិច្ចជាង៧៧ម៉ឺន ក្នុងនោះមានSME ចុះបញ្ជីផ្លូវការប្រហែល២ភាគរយ និងក្រុមហ៊ុនធំៗប្រហែល០.២ភាគរយ ។ក្រៅពីនោះ ជាង៩៧ភាគរយ គឺជាប្រភេទមីក្រូសហគ្រាស ហើយក្នុងចំណោមមីក្រូសហគ្រាស ភាគច្រើនគឺស្ថិតក្នុងសេដ្ឋកិច្ចក្រៅប្រព័ន្ធ៕