វិទ្យុជាតិកម្ពុជា កញ្ញា ខៀវ ណាវីន
អន្តរជាតិ៖ ទីភ្នាក់ងារសារព័ត៌មានវៀតណាមបានដកស្រង់សម្តីលោក Vu Duc Giang ប្រធានសមាគម វាយនភណ្ឌ និងកាត់ដេរវៀតណាមថា គោលដៅចំនួន ៤៤ ពាន់លានដុល្លាររបស់វៀតណាម ក្នុងការនាំចេញ វាយនភណ្ឌ និងកាត់ដេរនៅឆ្នាំនេះគឺអាចធ្វើទៅបាន។ នេះបើយោងតាមការចេញផ្សាយដោយសារព័ត៍មាន Xinhua។ សេចក្តីថ្លែងការណ៍នេះត្រូវបានធ្វើឡើងដោយផ្អែកលើការពិតដែលថាសាជីវកម្មលក់រាយជាច្រើនមកពីប្រទេសជា សមាជិកនៃកិច្ចព្រមព្រៀងពាណិជ្ជកម្មសេរីដូចជាកាណាដា អូស្ត្រាលី អឺរ៉ុប បានមកវៀតណាម ដើម្បីស្វែងរក ខ្សែសង្វាក់ផ្គត់ផ្គង់ជាមួយនឹងតម្លៃប្រកួតប្រជែង។ លោកបន្តថា ការកើនឡើងនៃការបញ្ជាទិញថ្មីៗនេះបានបង្ហាញថា ឧស្សាហកម្មវាយនភណ្ឌបានស្ទុះងើបឡើងវិញជាបន្តបន្ទាប់។ យោងតាមសមាគម ក្រុមហ៊ុនផលិតពិភពលោក ក៏ដូចជាខ្សែសង្វាក់ផ្គត់ផ្គង់វាយនភណ្ឌ និងកាត់ដេរ បន្តជ្រើសរើសប្រទេសវៀតណាមជាទិសដៅសម្រាប់ការផលិត និងការបញ្ជាទិញ។ យោងតាមសមាគមបានឱ្យដឹងថា វៀតណាមរកបានជាង ៩,៥៣ ពាន់លានដុល្លារ ពីការនាំ ចេញវាយនភណ្ឌ និងសម្លៀកបំពាក់នៅក្នុងត្រីមាសទីមួយនៃឆ្នាំនេះកើនឡើង ៩,៦២ ភាគរយ។ ប្រទេសនេះ ជាប់ចំណាត់ថ្នាក់លេខបី ក្នុងពិភពលោកលើការនាំចេញវាយនភណ្ឌ និងសម្លៀកបំពាក់៕
Comments