ADB អនុម័តប្រាក់កម្ចីចំនួន ៤១៩,៦ លានដុល្លារអាមេរិក ដើម្បីជំរុញប្រព័ន្ធអនាម័យរបស់ប្រទេសឥណ្ឌូនេស៊ី

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ ធនាគារអភិវឌ្ឍន៍អាស៊ី (ADB) បាននិយាយថា ខ្លួនបានអនុម័តប្រាក់កម្ចីចំនួន ៤១៩,៦ លានដុល្លារអាមេរិក ដើម្បីពង្រឹងប្រព័ន្ធអនាម័យនៅក្នុងប្រទេសឥណ្ឌូនេស៊ី។ នេះបើយោងតាមការចេញផ្សាយដោយសារព័ត៌មាន Xinhua។ ADB បាននិយាយថា គម្រោងអនាម័យរួមបញ្ចូលទូទាំងទីក្រុងនឹងជួយប្រទេសឥណ្ឌូនេស៊ីពង្រីកលទ្ធភាពទទួលបាននូវសេវាអនាម័យដែលធន់នឹងអាកាសធាតុគ្រប់គ្រាន់ និងគ្រប់គ្រងដោយសុវត្ថិភាពនៅក្នុងទីក្រុង Mataram, Pontianak និង Semarang។ ខណៈដែលគ្រួសារឥណ្ឌូនេស៊ីប្រ ហែល ៧៧ ភាគរយមានលទ្ធភាពប្រើប្រាស់គ្រឿងបរិក្ខារអនាម័យជាមូលដ្ឋាន ADB បាននិយាយថា មានតែ ៧ ភាគរយប៉ុណ្ណោះដែលមានលទ្ធភាពទទួលបានអនាម័យដែលត្រូវបានគ្រប់គ្រងដោយសុវត្ថិភាព ដែលធានាការចោលកាកសំណល់ក្នុងស្រុកប្រកបដោយសុវត្ថិភាពទៅកាន់រោងចក្រប្រព្រឹត្តិកម្មទឹកសំណល់ (WWTPs) សម្រាប់ដំណើរការបន្ត។ គម្រោងនេះមានគោលបំណងពង្រឹងប្រព័ន្ធអនាម័យសម្រាប់ប្រជាជនប្រមាណ ២,៥ លាននាក់នៅក្នុងទីក្រុងទាំងបី។ ធនាគារបាននិយាយថា វាត្រូវបានរចនាឡើងដោយផ្អែកលើគោលការណ៍អនាម័យរួមទូទាំងទីក្រុង ដែលធានាថាអ្នកគ្រប់គ្នាអាចទទួលបានសេវាអនាម័យដែលគ្រប់គ្រងដោយសមរម្យដោយការរួមបញ្ចូលប្រព័ន្ធលូ និងប្រព័ន្ធមិនមែនលូ៕