វិទ្យុជាតិកម្ពុជា៖ មន្ទីរព័ត៌មានខេត្តព្រះវិហារ

ព្រះវិហារ៖   នៅព្រឹកថ្ងៃទី៣១ ខែមីនា ឆ្នាំ២០២៥ ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ បានអញ្ជើញជាអធិបតីក្នុងពិធីប្រកាសចូលកាន់តំណែង លោក ឃិត សុធារ៉ា អតីតអភិបាលក្រុងព្រះវិហារ មកជាអភិបាល នៃគណៈអភិបាលស្រុកឆែបថ្មី ដោយមានការអញ្ជើញចូលរួមពីសំណាក់ថ្នាក់ដឹកនាំខេត្ត មេបញ្ជាការ កងកម្លាំងទាំងបី លោកប្រធាន អនុប្រធានមន្ទីរ អង្គភាពជុំវិញខេត្ត អភិបាលក្រុង ស្រុក និងមន្ត្រីពាក់ព័ន្ធជាច្រើនរូបទៀត។

 បន្ទាប់ពីពិធីប្រកាស និងប្រគល់ត្រា លោក ឃិត សុធារ៉ា បានប្តេជ្ញាចិត្តដឹកនាំ និងអភិវឌ្ឍន៍ស្រុកឆែបប្រកបដោយប្រសិទ្ធភាព និងចីរភាព តាមរយៈការពង្រឹងសាមគ្គីភាពផ្ទៃក្នុង កិច្ចសហការល្អជាមួយគ្រប់លំដាប់ថ្នាក់ ការលើកកម្ពស់ប្រសិទ្ធភាពការងារ ដោយតម្លាភាព ការដោះស្រាយបញ្ហារួមគ្នា ការថែរក្សាសន្តិសុខ សណ្តាប់ធ្នាប់តាម គោលនយោបាយ "ភូមិ ឃុំ-សង្កាត់ មានសុវត្ថិភាព" ការយកចិត្តទុកដាក់អភិវឌ្ឍន៍ហេដ្ឋារចនាសម្ព័ន្ធ លើកកម្ពស់សោភ័ណភាពស្រុក និងកិច្ចសហការល្អលើការងារព្រំដែនកម្ពុជា-ឡាវ ដើម្បីកសាងស្រុកឱ្យរីកចម្រើនប្រកបដោយចីរភាព និងសុខុមាលភាព។
  ក្នុងឱកាសនោះ ឯកឧត្តម គីម រិទ្ធី បានសម្តែងការអបអរសាទរចំពោះលោក ឃិត សុធារ៉ា ដែលទទួលបានការទុកចិត្តពីថ្នាក់ដឹកនាំ និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងការតែងតាំងជាអភិបាលស្រុកឆែប និងបានលើក ឡើងអំពីគោលការណ៍នៃការតែងតាំងអភិបាលក្រុង ស្រុក ដែលត្រូវឆ្លងកាត់ការវាយ តម្លៃយ៉ាងម៉ត់ចត់ និងត្រឹមត្រូវមុននឹងមានការសម្រេចឯកភាពពីសម្តេចនាយករដ្ឋមន្ត្រី ហើយបានសម្តែងការកោតសរសើរ និងថ្លែងអំណរគុណចំពោះថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងអាជ្ញាធរគ្រប់លំដាប់ថ្នាក់ចំពោះការខិតខំប្រឹងប្រែងកន្លងមក ជាពិសេសចំពោះលោកអភិបាលស្រុកឆែបស្តីទី ដែលបានជួយសម្របសម្រួលការងាររដ្ឋបាលស្រុកបានយ៉ាងរលូន។

ជាមួយនេះ ឯកឧត្តមក៏បានណែនាំដល់អភិបាលស្រុកឆែបថ្មី ឱ្យពង្រឹងប្រព័ន្ធអប់រំ ជាពិសេសនៅតំបន់កំពង់ស្រឡៅជាប់ព្រំដែនឡាវ ដោយពិនិត្យមើលការដំណើរការសាលាមត្តេយ្យសិក្សា គ្រូបង្រៀន និងកម្រិតសិក្សានៅសាលាបឋមសិក្សា អនុវិទ្យាល័យ និងវិទ្យាល័យ ហើយបានអបអរសាទ វិទ្យាល័យកំពង់ស្រឡៅដែលជាប់ចំណាត់ថ្នាក់ជាវិទ្យាល័យគំរូលេខ១០ទូទាំងប្រទេស និងគ្រោងនឹងដឹកនាំនាយកសាលាទូទាំង ខេត្តទៅទស្សនកិច្ចសិក្សាពីការគ្រប់គ្រងរបស់វិទ្យាល័យនេះ។

លើសពីនេះ ឯកឧត្តមអភិបាលខេត្តបានណែនាំឱ្យបន្តកិច្ចសហការ សាមគ្គីភាព ឯកភាពផ្ទៃក្នុងអង្គភាពឱ្យបានល្អជាមួយមន្ត្រីរាជការ កងកម្លាំងប្រដាប់អាវុធ និងអាជ្ញា ធរមូលដ្ឋាន ព្រមទាំងជំរុញឱ្យអភិបាលស្រុកថ្មីយកចិត្តទុកដាក់ ចុះជាប់ជាប្រចាំជាមួយសហគមន៍ ដើម្បីស្វែងយល់ និងដោះស្រាយបញ្ហាប្រឈមនានារបស់ប្រជាពលរដ្ឋ ហើយខិតខំអនុវត្តតួនាទីភារកិច្ចដោយប្រសិទ្ធភាព និងការទទួលខុសត្រូវខ្ពស់ ដើម្បីជួយឱ្យរដ្ឋបាលស្រុកឆែបកាន់តែរីកចម្រើន៕