វិទ្យុជាតិកម្ពុជា៖លោក ជួន បូណា ០១ ០៤ ២៥

បន្ទាយមានជ័យ៖ ខេត្តបន្ទាយមានជ័យ សម្រេច បញ្ចប់ការបន្ទោបង់ពាសវាលពាសកាលមានចំនួន ២ក្រុង ៧ស្រុក ស្មើនឹង១០០ភាគរយ ៦៧ឃុំ សង្កាត់ ស្មើនឹង ១០០ភាគរយ ៦៦៨ភូមិ ស្មើនឹង១០០ភាគរយ។
ថ្លែងក្នុងពិធីប្រកាសទទួលស្គាល់ខេត្តបន្ទាយមានជ័យជាខេត្តទី១៨ ដែលទទួលបានជ័យលាភីបញ្ចប់ការបន្ទោបង់ពាសវាលពាសកាល (ODF) នាព្រឹកថ្ងៃទី១ ខែមេសា ឆ្នាំ២០២៥ នៅក្នុងបរិវេណនៃសួនតេជោ ឈ្នះ ឈ្នះ ខេត្តបន្ទាយមានជ័យ ឯកឧត្តម អ៊ុំ រាត្រី អភិបាលនៃគណៈអភិបាលខេត្ត បានបង្ហាញអំពីស្ថានភាពទឹកស្អាត និងអនាម័យក្នុងខេត្តបន្ទាយមានជ័យ ដោយខេត្តបែងចែកចេញជា ២ក្រុង និង ៧ស្រុក មានចំនួន ៥៥ឃុំ និង១២សង្កាត់ មានភូមិចំនួន ៦៦៤ភូមិ មានប្រជាជនចំនួន ២០១ ៣៨១គ្រួសារ ក្នុងនោះខ្នងផ្ទះប្រើប្រាស់បង្គន់សរុប ១៧០ ២៩៩ខ្នងផ្ទះ ស្មើនឹង១០០ភាគរយ ខ្នងផ្ទះប្រើប្រាស់បង្គន់ផ្ទាល់ខ្លួនចំនួន ១៦៣ ០៤៩ខ្នងផ្ទះ ស្មើនឹង ៩៥,៧៤ភាគរយ ខ្នងផ្ទះប្រើបង្គន់រួមចំនួន ៧ ២៥០ខ្នងផ្ទះ ស្មើនឹង ៤,២៦ភាគរយ ដោយឡែក ក្រុង ស្រុក ឃុំ សង្កាត់ និងភូមិដែលបានសម្រេចបញ្ចប់ការបន្ទោបង់ពាសវាលពាសកាលមានចំនួន ២ក្រុង ៧ស្រុក ស្មើនឹង១០០ភាគរយ ៦៧ឃុំ សង្កាត់ ស្មើនឹង ១០០ភាគរយ ៦៦៨ភូមិ ស្មើនឹង១០០ភាគរយ។ 
ជាមួយគ្នានោះដែរ លោក នី សុផារ៉ាន នាយកប្រតិបត្តិនៃអង្គការទស្សនៈពិភពលោកអន្ដរជាតិប្រចាំនៅកម្ពុជា និងជាតំណាងអង្គការដៃគូអភិវឌ្ឍន៍វិស័យផ្គត់ផ្គង់ទឹកស្អាត និងអនាម័យជនបទនៅកម្ពុជា បានបង្ហាញពីលទ្ធផលផ្លែផ្កានៃកិច្ចសហប្រតិបត្តិការល្អ រវាងក្រសួងអភិវឌ្ឍន៍ជនបទ ជាមួយអង្គការ និងដៃគូអភិវឌ្ឍន៍នានា ជាពិសេសអង្គការទស្សនៈពិភពលោកអន្តរជាតិប្រចាំនៅកម្ពុជា និងអាជ្ញាធរមូលដ្ឋានដែលបានចូលរួមយ៉ាងសកម្ម រហូតធ្វើឱ្យខេត្តបន្ទាយមានជ័យសម្រេចបានជ័យលាភីបញ្ចប់ការបន្ទោបង់ពាសវាលពាសកាល (ខេត្ត ODF) នៅថ្ងៃនេះ។
ក្នុងឱកាសនោះ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានសម្ដែងនូវការកោតសរសើរ និងវាយតម្លៃខ្ពស់ចំពោះការរីកចម្រើន និងសមិទ្ធផលនានា ដែលខេត្តបន្ទាយមានជ័យសម្រេចបាន នាពេលកន្លងមកលើគ្រប់វិស័យ។
  សូមជម្រាបជូនផងដែរថា៖  គិតត្រឹមថ្ងៃនេះ មានរាជធានី ខេត្តចំនួន ១៨ហើយ ដែលទទួលបានជ័យលាភីបញ្ចប់ការបន្ទោបង់ពាលវាលពាលកាល ODF និង ODF+៕