កំណើន GDP របស់ប្រទេសវៀតណាមត្រូវបានគេព្យាករណ៍ថានឹងកើនឡើងដល់ ៦,៣ ភាគរយនៅឆ្នាំ ២០២៤

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ យោងតាមទីភ្នាក់ងារវាយតម្លៃ Fitch Ratings បានរាយការណ៍ថា កំណើន GDP របស់ប្រទេសវៀតណាមត្រូវបានគេព្យាករណ៍ថានឹងកើនឡើងដល់ ៦,៣ ភាគរយនៅឆ្នាំ ២០២៤ និង ៧ ភាគរយនៅឆ្នាំ ២០២៥។ នេះបើតាមការចេញផ្សាយដោយសារព័ត៌មាន Xinhua។ យោងតាម   Fitch Ratings បានឱ្យដឹងថា គោលនយោបាយសារពើពន្ធ និង រូបិយវត្ថុក្នុងស្រុកបានរួមចំណែកដល់ការផ្តល់នូវការគាំទ្រដល់សេដ្ឋកិច្ចដែលកំពុងកើនឡើង។ ទីភ្នាក់ងារនេះបានកត់សម្គាល់ថា កំណើនសេដ្ឋកិច្ចរបស់ប្រទេសវៀតណាមបានធ្លាក់ចុះមកនៅត្រឹម ៤,៣ ភាគរយក្នុងរយៈពេលប្រាំបួនខែដំបូងនៃឆ្នាំនេះ ក្នុងពេលកំពុងបន្តធ្លាក់ចុះនៅក្នុងវិស័យអចលនទ្រព្យក្នុងស្រុក។ កំណើននៃការចំណាយក្នុងគ្រួសាររបស់វៀតណាមនឹងមានភាពរឹងមាំនៅឆ្នាំ ២០២៤ ដោយសារភាពតានតឹងផ្នែកសេដ្ឋកិច្ចធ្លាក់ចុះ ហើយកំណើនផលិតផលក្នុងស្រុកសរុបពិតប្រាកដកើនឡើងឆ្ពោះទៅរកកម្រិតនិន្នាការលើសពី ៧ ភាគរយក្នុងមួយឆ្នាំ។ មូលនិធិរូបិយវត្ថុអន្តរជាតិបានព្យាករណ៍ពីកំណើនផលិតផលក្នុងស្រុកសរុប ៥,៨ ភាគរយ និង ៦,៩ ភាគរយនៅឆ្នាំ ២០២៤ និងឆ្នាំ ២០២៥ សម្រាប់ប្រទេសវៀតណាម។ យោងតាមធនាគារអភិវឌ្ឍន៍អាស៊ី សេដ្ឋកិច្ចរបស់ប្រទេសវៀតណាមត្រូវបានគេរំពឹងថានឹងកើនឡើង ៦ ភាគរយនៅឆ្នាំក្រោយ៕