វិទ្យុជាតិកម្ពុជា៖ លោកគឹមហឿនស្ទឹងត្រែង
M.C កម្មករ កម្មការិនីរួមនឹងសិស្សនិសិ្សត មានស្រុកកំណើតនៅខេត្តស្ទឹងត្រែង ជិត ៤០០នាក់ បានថ្លែងអំណរគុណចំពោះរាជរដ្ឋាភិ បាល ដែលបានផ្តល់លទ្ធភាពបានមកលេងស្រុកកំណើតក្នុងឱកាសបុណ្យចូលឆ្នាំ មានរថយន្តជូនធ្វើដំណើរ មិនចំណាយថវិកា ។
ក្នុងសកម្មភាពធ្វើដំណើរតាមរថយន្តក្រុងរបស់សាលារាជធានីភ្នំពេញនៅព្រឹកថ្ងៃទី១៧ខែមេសាឆ្នាំ២០២៤ លោកស្រី ឡុងសុខា កម្មការិនីរោងចក្រកាត់ដេរ មានស្រុកកំណើតនៅភូមិថ្មលាត សង្កាត់ស្រះឫស្សី ក្រុង ខេត្តស្ទឹង ត្រែងបានបញ្ជាក់ថា៖ កម្មករម្នាក់ៗសប្បាយរីករាយ បានមកដល់ស្រុក កំណើតប្រកបដោយសុវត្ថិភាព បានមកជួបក្រុមគ្រួសារ ហើយធ្វើដំណើរទៅមកតាមរថយន្ត មិន បានចំណាយថវិកាទេ ។
លោកសួនរដ្ឋា បុគ្គលិកបច្ចេកទេសផ្នែកបើកបរបានបញ្ជាក់ថា៖ក្រុមការងារបើកបររថយន្តបានអនុវត្តខ្ជាប់ខ្ជួនក្នុងការជួយសម្រួលទៅមក ដល់បងប្អូនកម្មករប្រកប ដោយការទទួលខុសត្រូវ ព្រោះនេះជាការរួមចំណែកជាមួយរាជរដ្ឋា ភិបាល និងរដ្ឋបាលរាជធានីភ្នំពេញ ក្នុងការសម្រួលដល់ជីវភាពរស់នៅរបស់បងប្អូនប្រជាពលរដ្ឋយើង ដែលមានទីលំនៅតាមខេត្ត បានទៅធ្វើការងារនៅរាជធានីភ្នំពេញ ជាកម្មកររោងចក្រ ។
លោកម៉ែន គង់នាយករងរដ្ឋបាលសាលាខេត្តស្ទឹងត្រែងបានចាត់ទុកថា៖នេះជាការយកចិត្តទុកដាក់ខ្ពស់របស់រាជរដ្ឋាភិបាល ក្នុងអាណត្តិទី០៧នេះ ដែលមានសម្តេចធិបតី ហ៊ុនម៉ាណែត ជានាយករដ្ឋមន្ត្រី ក៏ដូចជាអាណត្តិកន្លងមកដែរ ។
លោកបន្តថា៖ នៅក្នុងឱកាសថ្ងៃឈប់សម្រាកបុណ្យចូលចូលឆ្នាំប្រពៃណីជាតិខ្មែរយើងនេះខេត្តស្ទឹងត្រែងមានរថយន្តចំនួន១៥ គ្រឿង បានដឹកជញ្ជូនកម្មករកម្មការិនី និងប្អូនៗសិស្សនិស្សិតប្រមាណជិត៤០០នាក់ធ្វើដំណើរទៅមកប្រកបដោយសុវត្ថិភាព។
សូមបញ្ជាក់ថា៖ក្នុងឱកាសបុណ្យចូលចូលឆ្នាំប្រពៃណីជាតិប្រជាពលរដ្ឋយើងបានមកលេងស្រុកកំណើតប្រកបដោយភាពសប្បាយរីករាយក្រៃលែង ទាំងនៅរាជធានីភ្នំពេញ និងខេត្តគោលដៅ ព្រោះមានរថយន្តរហូតដល់ទៅ៤៥៥គ្រឿង សម្រាប់ដឹកជញ្ជូនប្រជាពលរដ្ឋយើងដើម្បីសម្រួលដល់ការចំណាយ ៕
Comments