វិទ្យុជាតិកម្ពុជា , វ៉ាង ភក្តី ១៦ ០៣ ២០២៥

គណៈកម្មាធិការជាតិរៀបចំការបោះឆ្នោត(គ.ជ.ប )បានចុះពិនិត្យមើលការប្រឡងជ្រើសរើសមន្ត្រីជាប់កិច្ច សន្យារយៈពេលខ្លីសម្រាប់បម្រើការងារពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៥ នៅ លេខាធិការដ្ឋានរៀបចំការបោះឆ្នោតខេត្តស្វាយរៀង នាថ្ងៃទី១៦ ខែមីនា ឆ្នាំ២០២៥នេះ។

ក្នុងឱកាសចុះពិនិត្យមើលការប្រឡងនេះ ឯកឧត្តម សោម សូរីដា សមាជិក គ.ជ.ប បានថ្លែងអំណរគុណ ដល់អនុគណៈកម្មការរៀបចំការប្រឡងខេត្តស្វាយរៀង ដែលបានខិតខំយកទឹកដាក់ក្នុងការរៀបចំ  ការប្រឡងជ្រើសរើស​នេះ ដោយអនុវត្តឲ្យបានត្រឹមត្រូវតាមច្បាប់ នីតិវិធី  និងសេចក្ដីណែនាំរបស់ គ.ជ.ប។

ឯកឧត្តម បានថ្លែងថា ក្នុងនាមឯកឧត្តមផ្ទាល់សូមថ្លែងអំណរគុណដោយសេចក្ដីគោរពដល់ក្រសួងស្ថាប័ន ដែលបានផ្ដល់ធនធានមនុស្សមកចូលរួមជាមួយ គ.ជ.ប ជាពិសេសក្រសួងអប់រំ​ យុវជន​ និងកីឡា។ 

ឯកឧត្តមបានបញ្ជាក់ថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៥ នេះ គឺ​ជាដំណាក់​កាល​សំខាន់មួយ​ក្នុង​ដំណើរ​ការ​រៀបចំ​ការ​បោះឆ្នោត​ នោះ​គឺ​ការ​រៀបចំ​បញ្ជី​បោះឆ្នោត​ដែល​ធានា​បាន​នូវ​ភាព​ពេញ​លេញ​ ភាព​ត្រឹមត្រូវ​ និង​មាន​បច្ចុប្បន្ន​ភាព​។ ហេតុនេះ មន្ត្រីកិច្ចសន្យា​រយៈពេល​ខ្លីដែលបាន ប្រឡងជាប់ សូមយកចិត្តទុកដាក់ខ្ពស់ ដោយអនុវត្តឲ្យបានត្រឹមត្រូវតាមច្បាប់ នីតិវិធី ក្រមសីលធម៌ និង លិខិតបទដ្ឋានគតិយុត្តនានា របស់ គ.ជ.ប ដើម្បីបង្ហាញនូវភាព​ត្រឹមត្រូវ​ យុត្តិធម៌ និង​តម្លាភាព​ ដែលអាច ទទួលយកបានពីគ្រប់ភាគីពាក់ព័ន្ធ ជាពិសេសគឺ​គណបក្សនយោបាយ​ដែល​ចូលរួម​ប្រកួតប្រជែង​ការ​បោះឆ្នោត​៕