វិទ្យុជាតិកម្ពុជា , វ៉ាង ភក្តី ០៨ ០៤ ២០២៥
ធនាគារជាតិនៃកម្ពុជា ក្នុងភាពជាដៃគូជាមួយសាជីវកម្មហិរញ្ញវត្ថុអន្តរជាតិ(IFC)  កំពុង ដឹកនាំការអភិវឌ្ឍ និងកែសម្រួលនិរន្តរភាពហិរញ្ញវត្ថុ ឱ្យស្របទៅនឹងបរិបទកម្ពុជា និងស្របតាមការអនុវត្តដែលបន្តការគាំទ្រដល់ការពង្រឹងកិច្ចការពារអ្នកប្រើប្រាស់ហិរញ្ញវត្ថុ និងការផ្តល់ប្រាក់កម្ចីប្រកបដោយទំនួលខុសត្រូវ ក៏ដូចជាជំរុញដល់ការរៀបចំបង្កើតទីផ្សារហិរញ្ញប្បទានបៃតង។
ថ្លែងក្នុងសិក្ខាសាលាពិគ្រោះយោបល់ស្តីពី«សេចក្តីព្រាងប្រព័ន្ធវដ្តករសាស្ត្រ សម្រាប់ហិរញ្ញវត្ថុប្រកបដោយចីរភាពនៅកម្ពុជា» នៅថ្ងៃទី៨ ខែមេសា ឆ្នាំ២០២៥ ឯកឧត្តម ឃឹម លាត ទេសាភិបាលរងធនាគារជាតិនៃកម្ពុជា លើកឡើងថា «ការផ្តល់មូលនិធិ នឹងត្រូវការជាចាំបាច់នូវកិច្ចខិតខំប្រឹងប្រែងក្នុងការផ្លាស់ប្តូរ ទៅកាន់សេដ្ឋកិច្ចដែលកាន់តែបៃតង ស្អាត និងប្រកបដោយនិរន្តរភាព ខណៈប្រទេសកម្ពុជា មានការប្តេជ្ញាចិត្ត និងកំពុងចាត់វិធានការយ៉ាងសកម្មចំពោះការបញ្ចេញកាបូន ដើម្បីសម្រេចគោលដៅរួមនៃអព្យាក្រឹតភាពកាបូននៅឆ្នាំ២០៥០ តាមរយៈការបង្កើនគម្របព្រៃឈើពី៤០ភាគរយទៅ៦០ភាគរយ នៃផ្ទៃដីប្រទេស ដោយដាំដើមឈើឱ្យបាន១លានដើមក្នុងមួយឆ្នាំ បង្កើនប្រភពថាមពលកកើតឡើងវិញបន្ថែមទៀតពី៦០ភាគរយទៅ៧០ភាគរយ បញ្ឈប់ការសាងសង់រោងចក្រថាមពលធ្យូងថ្មថ្មី និងជំរុញគោលនយោបាយអំណោយផលសម្រាប់រថយន្តអគ្គិសនី ជាដើម។
ឯកឧត្តម បន្តថា ធនាគារជាតិនៃកម្ពុជា ក្នុងនាមជាអាជ្ញាធររូបិយវត្ថុ និងជានិយតករធនាគារ ខិតខំកសាងក្របខណ្ឌ និងបរិយាកាសអំណោយផល ដើម្បីប្រមូលហិរញ្ញវត្ថុចាំបាច់ ដើម្បីបំពេញតាមមហិច្ឆតាអាកាសធាតុរបស់រាជរដ្ឋាភិបាល។ «នៅឆ្នាំនេះ យើងមានគម្រោងអនុវត្តនិក្ខេបបទហិរញ្ញវត្ថុប្រកបដោយនិរន្តរភាពជាតិសម្រាប់វិស័យបីដំបូង ដែលជាប្រធានបទ នៃការពិគ្រោះយោបល់របស់យើងនៅថ្ងៃនេះ ផ្សព្វផ្សាយផែនទីបង្ហាញផ្លូវស្តីពីហិរញ្ញវត្ថុប្រកបដោយនិរន្តរភាព ដើម្បីដាក់ចេញនូវគោលការណ៍ណែនាំ និងផែនការសកម្មភាពច្បាស់លាស់ ដើម្បីសម្រេចបាននូវមហិច្ឆតារបស់យើង»។ ឯកឧត្តម បានបញ្ជាក់បន្ថែម «ធនាគារជាតិនៃកម្ពុជាក៏បានបញ្ចប់ការវាយតម្លៃបឋមលើវិស័យធនាគារលើហានិភ័យទាក់ទងនឹងការប្រែប្រួលអាកាសធាតុ ដើម្បី យល់កាន់តែច្បាស់អំពីទំហំពិតនៃធនាគារហានិភ័យទាំងរូបវន្ត និងការផ្លាស់ប្តូរដែលអាចកើតមានពីព្រឹត្តិការណ៍ ទាក់ទងនឹងអាកាសធាតុ។ នេះគឺដើម្បីធានាថាយើងកំណត់បទប្បញ្ញត្តិពាក់ព័ន្ធនិងសមាមាត្រដើម្បី គ្រប់គ្រងហានិភ័យទាំងនេះ។ ជាមួយគ្នានេះ ធនាគារជាតិនៃកម្ពុជា ក៏បានបញ្ចប់សេចក្តីព្រាងគោលការណ៍ណែនាំ ស្តីពីការគ្រប់គ្រងហានិភ័យសង្គម និងបរិស្ថាន ដើម្បីជួយធនាគារធានាលំហូរហិរញ្ញប្បទានរបស់ពួកគេមិនបញ្ចប់ដោយ សកម្មភាពបំផ្លាញបរិស្ថាន និងសង្គម។»
លោកស្រី Elvira Morella នាយកគ្រប់គ្រងផ្នែកសេដ្ឋកិច្ច និងប្រឹក្សាយោបល់ប្រចាំប្រទេសនៃសាជីវកម្មហិរញ្ញវត្ថុអន្តរជាតិ(IFC) លើកទឹកចិត្តដល់ការផ្តល់ហិរញ្ញវត្ថុឥណទានចំពោះការវិនិយោគដូចជា វិស័យថាមពលកកើតឡើងវិញ ហេដ្ឋារចនាសម្ព័ន្ធបៃតង និង កសិកម្មប្រកបដោយនិរន្តរភាព ខណៈពេលដែលជំរុញឱ្យមានតម្លាភាព និងការជឿទុកចិត្តលើការវិនិយោគទាំងនេះ។
សូមបញ្ជាក់ថា សិក្ខាសាលាពិគ្រោះយោបល់ស្តីពី«សេចក្តីព្រាងប្រព័ន្ធវដ្តករសាស្ត្រ សម្រាប់ហិរញ្ញវត្ថុប្រកបដោយចីរភាពនៅកម្ពុជា» ដែលមានអ្នកចូលរួមមកពីតំណាងស្ថាប័នហិរញ្ញវត្ថុ វិស័យសាធារណៈ និងឯកជន ក្រសួងស្ថាប័នរដ្ឋ សមាគមធុរកិច្ច ដៃគូអភិវឌ្ឍន៍ អង្គការមិនមែនរដ្ឋាភិបាល និងអ្នកបង្កើតគោលនយោបាយសំខាន់ៗ មានគោលបំណង
ផ្តល់ទិដ្ឋភាពទូទៅនៃដំណើរការអភិវឌ្ឍន៍ និងរចនាសម្ព័ន្ធសំខាន់នៃសេចក្តីព្រាងនិរន្តរភាពហិរញ្ញវត្ថុកម្ពុជា ប្រកបដោយនិរន្តរភាព និងការប្រមូលធាតុចូលអំពីវិស័យអាទិភាពដែលមានលក្ខណៈវិនិច្ឆ័យនៃការការពារសង្គម សម្រាប់ដាក់បញ្ចូលក្នុងសេចក្តីព្រាងនេះ៕