វិទ្យុជាតិកម្ពុជា លោកអេង យូ ថ្ងៃទី១៥ ខែមេសា ឆ្នាំ២០២៥

MC. នៅព្រឹកថ្ងៃទី១៥ ខែមេសា ឆ្នាំ២០២៥ ដែលជាថ្ងៃទី២នៃព្រឹត្តិការណ៍អង្គរសង្រ្កាន្ត មានប្រារព្ធពិធី វាលុកចេតិយ ឬហៅថាពូនភ្នំខ្សាច់ ដែលជាពិធីមានតាំងពីបុរាណកាលរបស់ខ្មែរ ក្នុងឱកាសចូលឆ្នាំថ្មី ប្រពៃណីជាតិ នៅវត្តឥន្ទបត្តបុរី ហៅវត្តអង្គរខាងត្បូង។ពិធីនេះ មានការអញ្ជើញចូលរួមពី ឯកឧត្តម ប្រាក់ សោភ័ណ អភិបាលខេត្តសៀមរាប តំណាងដ៏ខ្ពង់ខ្ពស់របស់ឯកឧត្តម ហ៊ុន ម៉ានី ប្រធានសហភាពសហព័ន្ធ យុវជនកម្ពុជា និងលោកជំទាវ រួមនឹងថ្នាក់ដឹកនាំខេត្ត មន្ទីរអង្គភាពជុំវិញខេត្ត ក្រុមការងារ សសយក និងប្រជាពលរដ្ឋពុទ្ធបរិស័ទយ៉ាងច្រើនកុះករ។

តាមទំនៀមទម្លាប់ក្នុងឱកាសចូលឆ្នាំថ្មីប្រពៃណីជាតិខ្មែរ ប្រជាពលរដ្ឋខ្មែរតែងតែនាំគ្នាទៅវត្ត ប្រគេនចង្ហាន់ព្រះសង្ឃ រៀបចំពលិការគ្រឿងសក្ការបូជា មានអុជទៀន ធូប ប្រទីបជ្វាលា ថ្វាយព្រះរតនត្រ័យ ធ្វើបុណ្យទានតាមប្រពៃណី វប្បធម៌សាសនា ទំនៀមទម្លាប់ពីដូនតា ដែលមាន  ជាយូរលង់មកហើយៗក្នុងឱកាសចូលឆ្នាំថ្មីនេះ ក៏មានពិធីសាសនាជាច្រើននៅតាមវត្តអារាមនានា ក្នុងនោះពិធីពូនភ្នំខ្សាច់ ដែលគេសន្មតហៅថា «វាលុកចេតិយ» គឺតំណាងឱ្យ ព្រះចូឡាមុនីចេតិយ ដែលសាងសម្រាប់បញ្ចុះព្រះកេសា និងព្រះចង្កូមកែវនៃព្រះពុទ្ធបរមគ្រូ ហើយ ក៏ជាប្រពៃណីទំនៀមទម្លាប់  ដែលខ្មែរយើងតែងតែនិយមធ្វើជារៀងរាល់ពេលចូលឆ្នាំ ឬធ្វើក្នុងឱកាសពិធីផ្សេងៗដូចជាបុណ្យភ្ជុំបិណ្ឌ ជាដើម។
ក្រៅពីនេះ ពិធីវាលុកចេតិយ គេច្រើនតែធ្វើពេលបុណ្យចម្រើនអាយុ ជូនចំពោះមាតាបិតា ដែលពលរដ្ឋ មានជំនឿថា ដើម្បីរំដោះគ្រោះចង្រៃ រំដោះកម្មពៀរវេរា ដែលខ្លួនបានធ្វើកន្លងមក ក្នុងអតីតជាតិក្ដី នៅក្នុងបច្ចុប្បន្នជាតិក្ដី ឱ្យវិនាសសាបសូន្យបាត់ទៅ។ នៅក្នុងថ្ងៃបុណ្យចូលឆ្នាំថ្មីប្រពៃណីជាតិ គ្រប់វត្តអារាមមិនដែលខកខានឡើយ ដោយបានរៀបចំទីធ្លាសម្រាប់ធ្វើវាលុកចេតិយ ព្រោះយល់ថា វាលុកចេតិយនេះ មានអានុភាពអាចរំដោះទុក្ខទោសភ័យទាំងឡាយ ឱ្យវិនាសខ្ចាត់ខ្ចាយអស់គ្មានសល់៕