វិទ្យុជាតិកម្ពុជាលោកគឹមហឿនថ្ងៃទី ២៩ មេសាឆ្នាំ ២០២៥

ខេត្តស្ទឹងត្រែង៖ ត្រីមេពូជ នៅទន្លេមេគង្គលើ ចាប់ផ្តើមពងកូនពីខែឧសភាតទៅ ហើយអាជ្ញាធរពាក់ព័ន្ធ និងមន្ត្រីខណ្ឌជលផលស្ទឹងត្រែង បានប្រកាសឲ្យ ប្រជាអ្នកនេសាទរួមគ្នាអភិរក្ស ធនធានមច្ឆជាតិ នៅរដូវវាពងកូន  ដោយគ្រាន់តែនាំគ្នាគោរពច្បាប់ជលផលទាំងអស់គ្នា។

ក្នុងសកម្មភាពផ្សព្វផ្សាយសេចក្តីជូនដំណឹង ស្តីពីរដូវបិទនេសាទត្រី នៅខេត្តស្ទឹងត្រែងចាប់ពីថ្ងៃទី ០១ ខែឧសភា ដល់ថ្ងៃទី ៣០ខែកញ្ញា  នៅថ្ងៃទី២៩ ខែមេសាឆ្នាំ២០២៥នេះ លោកស្រីសំ វិចិត្រ  ប្រធាន  ខណ្ឌជលផលខេត្តបានបញ្ជាក់ថា៖រដូវត្រីពងកូនចូលមកដល់ហើយ ដូច្នេះប្រជាអ្នកនេសាទទាំងអស់  ត្រូវតែនាំគ្នាអនុវត្តន៍សេចក្តីជូនដំណឹងរបស់រដ្ឋបាលខេត្ត ឱ្យបានខ្ជាប់ខ្ជួន ។
 លោកពន្យល់ថា៖ ជាមួយនិងការចូលរួមអភិរក្សនេះសូមឱ្យ ភាគីពាក់ព័ន្ធជួយទប់ស្កាត់បទល្មើសផ្សេងៗ   បន្ថែមទៀត។
លោកបន្តថា៖ ប្រជាអ្នកនេសាទ ត្រូវមានឆន្ទៈស្រឡាញ់ធនធានមច្ឆជាតិរបស់ខ្លួន  ជាពិសេសនៅក្នុងរដូវ បិទនេសាទនេះ ចៀសវាងកុំប្រើប្រាស់ឧបករណ៍នេសាទ ដែលច្បាប់ហាមឃាត់   ឬលួចចូលទៅធ្វើនេសាទ  ក្នុងអន្លង់អភិរក្ស បង្កផលប៉ះពាល់ត្រីមេពូជ និងសត្វផ្សោត ដែលជារដូវពងកូន ។
 លោក ធឿនសុខលីន អ្នកនេសាទនៅភូមិ ឃុំកោះព្រះ ស្រុកសៀមបូក បានបញ្ជាក់ថា៖ដល់ពេលរដូវ  បិទនេសាទម្ដងៗ  អ្នកនេសាទភាគច្រើនបានចូលរួមអនុវត្តបានល្អ  មិនហ៊ានចេញធ្វើនេសាទ ផ្តេសផ្តាសទេ ។ 
លោកបន្តថា ៖ជាមួយគ្នានេះក៏នៅមានជនសង្ស័យមួយចំនួនបានលួចលាក់ប្រព្រឹត្តបទល្មើស  ហើយប្រជាសហគមន៍ នេសាទ បង្រ្កាបមិនបាន គឺបានត្រឹមតែរាយការណ៍ជូនអាជ្ញាធរតែប៉ុណ្ណោះ  ព្រោះបទល្មើសភាគច្រើនធ្វើសកម្មភាព លួចប្រើប្រាស់ឧបករណ៍ឆក់នៅពេលយប់ ឬពេលជិតភ្លឺតែម្ដង ។
  លោកឃិន ម៉ានីប្រធានសហគមន៍នេសាទ នៅចំណុចអូរឡង់ ឃុំអូរម្រះ ស្រុកសៀមបូកខេត្តស្ទឹងត្រែង  បានបញ្ជាក់ថា៖ទោះជាយ៉ាងណាការលួចប្រើឧបករណ៍ នេសាទខុសច្បាប់ ប្រជាសហគមន៍ចុះ  បង្ក្រាប  ជាប្រចាំ ទោះ បីថាឃាត់ខ្លួន ជនសង្ស័យមិនបាន ពេលខ្លះ ក៏យើង រឹបអូសបានឧបករណ៍ល្មើសយកមក កម្ទេចចោលដែរ  ។   
សូមបញ្ជាក់ថា៖ខេត្តស្ទឹងត្រែងនឹងចាប់បិទការនេសាទពីថ្ងៃទី១ ខែឧសភា ដោយសារតែនៅទន្លេមេគង្គ  លើនៃខេត្តស្ទឹងត្រែងត្រីមេពូជចាប់ពងកូនពីខែឧសភានេះទៅ ៕