វិទ្យុជាតិកម្ពុជា៖ ដោយ លោក ចន ណារិទ្ធ
រាជធានីភ្នំពេញ៖ រដ្ឋបាលរាជធានីភ្នំពេញគ្រោងទិញរថយន្តសម្រាប់បូមលូចំនួន១៨គ្រឿងបន្ថែមទៀត ដើម្បីជំរុញឲ្យការ ស្តារលូនៅក្នុងរាជធានីភ្នំពេញដំណើរការទៅបានរលូន និងលឿនទៅតាមការគ្រោងទុក ដើម្បីឲ្យប្រពន្ធលូទាំងនោះអាច រំដោះទឹកបាននារដូវវស្សា ។ គម្រោងការនេះត្រូវបានឯកឧត្តម ឃួង ស្រេង អភិបាលរាជធានីភ្នំពេញ លេីកឡេីងនៅក្នុងកិច្ចប្រជុំស្តីពីការងារគ្រប់គ្រង និងវិធានការទប់ស្កាត់ ម៉ូតូ និងរថយន្តបំពាក់បំពង់សុីម៉ាំងប្រែនៗ នៅសាលារាជធានីភ្នំពេញ នាព្រឹកថ្ងៃទី២០ខែមករាឆ្នាំ២០២១។
ឯកឧត្តម ឃួង ស្រេង បាន បញ្ជាក់ថា ការស្ដារលូ ដោយដៃមកដល់សម័យនេះ គឺវាហួស ពេលហើយ ដូច្នេះរដ្ឋបាលរាជធានីភ្នំពេញនឹងទិញរថយន្តសម្រាប់បូមលូចំនួន១៨គ្រឿងបន្ថែមទៀតដើម្បីទ្រសភាពការណ៍នៃការស្តារលូនេះឱ្យបានល្អ លឿន ពិសេសយើងត្រូវធ្វើឲ្យបានទាន់ពេលនៅក្នុងរដូវ ប្រាំងនេះ។ មានន័យថា ពេលភ្លៀងធ្លាក់មកដល់ប្រព័ន្ធលូយើងអាចហូរបានស្រួល រំដោះការលិចលង់បានតែម្តង៕
Comments