វិទ្យុជាតិកម្ពុជា ៖ លោកស្រី ធីណា ឌីណេ ១៨ ០៩ ២០២៣
MC៖ ប្រតិភូយុវជនមកពីសមាគមជាតិ ក្នុងភូមិភាគអាស៊ីអាគ្នេយ៍ បង្ហាញការពេញចិត្តចំពោះការរៀបចំរបស់កម្ពុជា ក្នុងវេទិកាយុវជនលើកទី២ នៃសមាគមជាតិ កាកបាទក្រហម និងអឌ្ឍចន្ទក្រហមភូមិភាគអាស៊ីអាគ្នេយ៍ ដែលកាកបាទក្រហមកម្ពុជាធ្វើជាម្ចាស់ ផ្ទះ។
កញ្ញា Camille Ramirez Baring ប្រធានយុវជនកាកបាទ ក្រហមហ្វីលីពីន ដែលបានចូលរួមក្នុងវេទិកាយុវជនលើកទី២ នៃសមាគមជាតិកាកបាទក្រហម និងអឌ្ឍចន្ទក្រហមភូមិភាគអាស៊ីអាគ្នេយ៍បានឱ្យដឹងថា កញ្ញាបានមកដល់ប្រទេសកម្ពុជា នៅថ្ងៃទី ១៦ ខែកញ្ញាមកម្ល៉េះ ។ កញ្ញាពេញ ចិត្ត ចំពោះការរៀបចំរបស់កាកបាទ ក្រហមកម្ពុជាក្នុងនាមជាម្ចាស់ផ្ទះ ដែលបានយកចិត្តទុកដាក់ មកលើប្រតិភូយុវជនទាំងអស់ មកពីបណ្តាប្រទេសនានា។ ក្នុងនោះកញ្ញា ក៏ បានបង្ហាញអារម្មណ៍រីករាយ ដែលមកចូលរួមក្នុងវេទិកាយុវជនលើកទី២នៅប្រទេសកម្ពុជានេះ ដើម្បីទទួលបាននូវចំណេះដឹង បទពិ សោធន៍ និងគំនិតច្នៃប្រឌិតល្អៗ យកទៅចែករំលែកទៅកាន់ប្រទេសរបស់ខ្លួន។
« គាត់មានអារម្មណ៍សប្បាយរីករាយមែនទែនដែលបានមកចូលរួមនៅក្នុងវេទិកាយុវជនលើកទី២នេះ ហើយគាត់បានភ្លក្សនូវរសជាតិអាហារថ្មីៗនៅប្រទេសកម្ពុជា ដែលប្រទេសកម្ពុជាទទួលគាត់ ក៏ដូចជាគាត់បានយល់ដឹងពីវប្បធម៌ ក៏ដូចជាការរស់នៅរបស់ប្រជាជនកម្ពុជា។ ហើយមិនតែប៉ុណ្ណោះ ក៏បានយល់ដឹងកាន់តែច្បាស់ពីអត្តចរិតរបស់ប្រជាជនកម្ពុជាមានភាពរួសរាយរាក់ទាក់។»
ក្នុងនោះដែរ លោក Lee Van Can អ្នកស្មគ្រ័ចិត្តអឌ្ឍចន្ទក្រហមម៉ាឡេស៊ី បានឱ្យដឹងដែរថា នេះគឺជាលើកទី១សម្រាប់រូបលោក ដែលបានមកប្រទេសកម្ពុជានិងបានចូល រួមនៅក្នុងវេទិកាយុវជននេះ។ លោកបានបង្ហាញការចូលចិត្តនូវម្ហូបអាហារប្រពៃណីរបស់កម្ពុជា ដែលបានរៀបចំជូនពួកគាត់មានរសជាតិឆ្ងាញ់។
គួរជម្រាបថា វេទិកាយុវជនលើកទី២ នៃសមាគមជាតិកាកបាទក្រហម និងអឌ្ឍចន្ទក្រហម ភូមិភាគអាស៊ីអាគ្នេយ៍ ចាប់ពីថ្ងៃទី១៧-២០ ខែកញ្ញា ឆ្នាំ២០២៣ នាសណ្ឋាគារសុខាភ្នំពេញ ដែលកាកបាទក្រហមកម្ពុជាធ្វើជាម្ចាស់ ផ្ទះ ក្នុងនោះមានការអញ្ជើញចូលរួមពីប្រតិភូយុវជនមកពីសមាគមជាតិចំនួន ១០ ក្នុងភូមិភាគអាស៊ី- អាគ្នេយ៍ រួមមានកាកបាទក្រហមឥណ្ឌូនេស៊ី, កាកបាទក្រហមឡាវ, អឌ្ឍចន្ទក្រហមម៉ាឡេស៊ី, កាកបាទក្រហមមីយ៉ាន់ម៉ា, កាកបាទក្រហមហ្វីលីពីន, កាកបាទក្រហមសិង្ហបុរី, កាកបាទក្រហមថៃ, កាកបាទក្រហមទីម័រខាងកើត និងកាកបាទក្រហមវៀតណាម៕
Comments