អាកាសយានដ្ឋាន ថៃ បានបង្ហាញពីលទ្ធផលល្អប្រសើរឡើងវិញ

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ Airports of Thailand Plc បានកត់ត្រាប្រាក់ចំណេញសុទ្ធចំនួន ៨,៧៩ ពាន់លានបាតនៅក្នុងឆ្នាំ ២០២៣ បើធៀបនឹងការខាតបង់សុទ្ធចំនួន ១១,០៩ ពាន់លានបាតនៅក្នុងឆ្នាំ ២០២២។ នេះបើយោងតាមការចេញផ្សាយដោយសារព័ត៌មាន Bangkok Post។ លោក Kirati Kitmanawat នាយកប្រតិបត្តិបាននិយាយថា អាកាសយានដ្ឋានទាំងប្រាំមួយ ដែលដំណើរការដោយ AoT បានបង្ហាញលទ្ធផលល្អប្រសើរនៅក្នុងឆ្នាំសារពើពន្ធដែលទើបនឹងបញ្ចប់ ខណៈដែលស្ថានភាពក្រោយកូវីដ-១៩ មានភាពប្រសើរឡើង ហើយវិស័យអាកាសចរណ៍ និងទេសចរណ៍បានចាប់ផ្តើមងើបឡើងវិញ។ AoT ប្រតិបត្តិការអាកាសយានដ្ឋានសុវណ្ណភូមិ ដុនមឿង ឈៀងម៉ៃ ឈៀងរ៉ៃ ភូកេត និងហាតយ៉ៃ ដោយឆ្នាំសារពើពន្ធចាប់ផ្តើមពីខែតុលាដល់ចុងខែកញ្ញា។ លោក Kirati បាននិយាយថា នៅក្នុងសារពើពន្ធឆ្នាំ ២០២៣ អាកាសយានដ្ឋានទាំងប្រាំមួយបានបម្រើជើងហោះហើរចំនួន ៦៣៩,៨៩១ជើង កើនឡើង ៦២,២២% ពីមួយឆ្នាំទៅមួយឆ្នាំ ដែលគ្រប់គ្រងអ្នកដំណើរ ១០០,០៦ លាននាក់កើនឡើង ១១៤,៣១% ។ នាយកប្រតិបត្តិ AoT បាននិយាយថា "នៅឆ្នាំ ២០២៣ យើងមានអ្នកដំណើរ ១០០ លាននាក់។ នៅឆ្នាំ ២០១៩ មុនពេលកូវីដ-១៩ មានអ្នកដំណើរ ១២០ លាននាក់។ យើងរំពឹងថាចំនួននេះនឹងឡើងជិតដល់ចំនួនមុនកូវីដ-១៩ នៅឆ្នាំ ២០២៤"៕