សាជីវកម្មដែនសមុទ្រវៀតណាមចុះកិច្ចព្រមព្រៀងជាមួយក្រុមហ៊ុនប្រឹក្សាសកល

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ សាជីវកម្មដែនសមុទ្រវៀតណាម (VIMC) ថ្មីៗនេះបានចុះហត្ថលេខាលើកិច្ចសន្យាជាមួយក្រុមហ៊ុនស្រាវជ្រាវ និងប្រឹក្សាយុទ្ធសាស្ត្រសកល Roland Berger ដើម្បីអភិវឌ្ឍខ្លួនរហូតដល់ឆ្នាំ ២០៣០ ជាមួយនឹងចក្ខុវិស័យដល់ឆ្នាំ ២០៣៥។  នេះបើយោងតាមការចេញផ្សាយដោយសារព័ត៌មាន Vietnam Plus។ យោងតាមកិច្ចសន្យា Roland Berger នឹងរៀបចំដំណោះស្រាយដើម្បីអនុវត្តយុទ្ធសាស្ត្រលើប្រតិបត្តិការអាជីវកម្មរបស់ VIMC ដោយផ្តោតជាក់លាក់លើការប្រើប្រាស់ជំនាញរបស់ខ្លួន និងភ្ជាប់ក្រុមហ៊ុនជាមួយអង្គភាពហិរញ្ញវត្ថុ ការដឹកជញ្ជូនតាមសមុទ្រ និងដឹកជញ្ជូនឈានមុខគេរបស់ពិភពលោក។ VIMC ក៏បានស្នើឱ្យ Roland Berger ពិចារណាលើការអនុវត្តបច្ចេកវិទ្យាព័ត៌មាន ដែលមានបំណងសម្រាប់បច្ចេកវិទ្យាបៃតង ដើម្បីជួយ VIMC សម្រេចបាននូវការអភិវឌ្ឍន៍កាន់តែលឿន និងប្រកបដោយនិរន្តរភាពនាពេលអនាគត។ VIMC ត្រូវបានគេចាត់ទុកថាជា "យក្ស" នៅក្នុងឧស្សាហកម្មដែនសមុទ្ររបស់វៀតណាម ដែលប្រតិបត្តិការកំពង់ផែសមុទ្រចំនួន ១៥ និងកំពង់ផែទន្លេមួយ ដែលមានចំណតសរុបចំនួន ៧៥ ដែលលាតសន្ធឹងប្រវែង ១៣,៥៧១ ម៉ែត្រ ដែលស្មើនឹង ២៦% នៃចំនួនកំពង់ផែសរុប និងជិត ១៧% នៃប្រវែងសរុបនៃចំណតទូទាំងប្រទេស ហើយក៏មានកងនាវាចំនួន ៦៤ គ្រឿងដែលមានទម្ងន់សរុបចំនួន ១,៤៥ លានតោន ឬប្រហែល ២០% នៃកងនាវាជាតិ៕