វិទ្យុជាតិកម្ពុជា លោកអេង យូ ភ្នាក់ងារខេត្តសៀមរាប ថ្ងៃទី៣១ ខែមីនា ឆ្នាំ២០២៥

 

MC.  សហគមន៍ទេសចរណ៍វប្បធម៌ ធម្មជាតិ បឹងពារាំង ខេត្តសៀមរាប ជាគោលដៅទេសចរណ៍ដ៏ទាក់ទាញមួយ សម្រាប់ទេសចរជាតិ និងអន្តរជាតិ មកទស្សនាកម្សាន្ត និងផ្តិតយករូបភាពនៃទេសភាពបៃតង សត្វស្លាបទឹក ជាតំបន់អភិរក្ស ទីជម្រកមច្ឆាជាតិ និងជីវ:ចម្រុះ-ជីវសាស្រ្ត ព័ទ្ធដោយព្រៃលិចទឹក ដែលជាជម្រកត្រីមេពូជ និងសត្វស្លាបប្រមាណជាង១៧០ ប្រភេទអាស្រ័យនៅ និងស្វែងរកចំណីអាហារជាដើម។

       លោក ភុត ផានិត ប្រធានផ្នែកទេសចរណ៍នៃសហគមន៍ទេស ចរណ៍បឹងពារាំង បានប្រាប់អ្នកយកព័ត៌មានវិទ្យុជាតិកម្ពុជាថា៖ ពារាំងជាបឹងធម្មជាតិមួយ បានប្រែ ក្លាយមកជាសហគមន៍ទេសចរណ៍វប្បធម៌ ធម្មជាតិ ដែលមានការទទួលស្គាល់ពីក្រសួងមហាផ្ទៃ ក្នុងឆ្នាំ២០១៥ ក្នុងទំហំផ្ទៃដីគ្របដណ្តប់ជាង៣ពាន់ហិកតា និងមានផ្ទៃទឹកប្រមាណ២៥០ហិកតានារដូវប្រាំង។ ជាបន្តបន្ទាប់សហគមន៍ មានការទទួលស្គាល់ពីរាជរដ្ឋាភិបាលកម្ពុជា ឱ្យតំបន់នេះ ក្លាយជាតំបន់ការពារធម្មជាតិ និងអភិរក្សជីវៈចម្រុះឱ្យបានគង់វង្ស។លោកថា តាមរយៈសកម្មភាពនៃការការពារ និងអភិរក្សរបស់ប្រជាសហគមន៍ជ្រាវ បានប្រែក្លាយតំបន់នេះ ទៅជាមណ្ឌលដ៏សុខសាន្តសម្រាប់ត្រីមេពូជ ព្រៃលិចទឹក និងសត្វស្លាបទឹក ជាង១៧០ប្រភេទពឹងអាស្រ័យ ដែលញុំាងឱ្យតំបន់នេះ ក្លាយទៅជាគោលដៅដ៏ទាក់ទាញមួយ សម្រាប់ទេសចរជាតិ និងអន្តរជាតិ មកទស្សនា និងផ្តិតយករូបភាពនៃទេសភាពបៃតង សត្វស្លាបទឹក សត្វស្លាបដីសើម រាប់រយប្រភេទ។ លោកបញ្ជាក់ទៀតថា តាមការស្ទាបស្ទង់មតិយោបល់ពីភ្ញៀវទេសចរ ជាពិសេសទេសចរបរទេសបង្ហាញថា បឹងពារាំង ជាទីតាំងដ៏ស្រស់ស្អាតបំផុតលើពិភពលោក។

 អ្វីដែលទាក់ទាញបំផុតហ្នឹង យើងមានសត្វស្លាបដូចជារនាលពណ៌ និងស្លាបជាច្រើនប្រភេទទៀតដែលខ្ញុំមិនអាចរៀបរាប់បាន ជាពិសេសទាក់ទាញបំផុតគឺគាត់មើលត្រីមេពូជ យើងមាន១០កោះ ទាំង១០កោះនេះមានកោះ២ដែលយើងអាចមកលេងបាន គឺកោះលោកយាយ និងកោះមនោយើងមកបោះតង់បោះអីបាន ហើយ៨កោះទៀតយើងមានលែងសត្វ ដូចអណ្តើករាប់ពាន់ក្បាល និងពស់ថ្លាន់ យើងលែងរាប់ពាន់ក្បាល ហើយសត្វភេជាង៤០០ប្រភេទ និងស្វាព្រាម ជាង១០០ក្បាល យើងនិយាយឱ្យចំទាំងជីវៈចម្រុះសត្វស្លាបជាង១៧០ប្រភេទ។ តាមខ្ញុំជាប្រធានផ្នែកទេសចរណ៍ និងជាមគ្គុទ្ទេសក៍សត្វ បានទទួល ការគាំទ្រពីភ្ញៀវថា កន្លែងនេះស្អាត នៅលើពិភពលោកមានតែពីរកន្លែងទេ នៅកោះបាលី និងបឹងពារាំងយើង នេះជាការសរសើរពីភ្ញៀវបរទេស កន្លែងស្អាតបំផុតមើលថ្ងៃលិច ថ្ងៃរះ តំបន់ដែលស្ងប់ស្ងាត់។

សូមជម្រាបថា បឹងពារាំង ជាបឹងធម្មជាតិដែលល្អឯក និងជាទីជម្រកមច្ឆាជាតិ និងជីវ:ចម្រុះ-ជីវសាស្រ្ត ព័ទ្ធដោយព្រៃលិចទឹក ដែលជាជម្រកត្រីមេពូជ និងសត្វស្លាបប្រមាណជាង១៧០ ប្រភេទ។ បឹងនេះគ្របដណ្តប់ផ្ទៃទឹក២៥០ហិកតា នារដូវប្រាំង មានទីតាំងជាប់សង្កាត់ជ្រាវនិងសង្កាត់សៀមរាប ចម្ងាយប្រមាណ១៦គីឡូម៉ែត្រ ខាងត្បូងទីក្រុងសៀមរាប និង ២គីឡូម៉ែត្រ ខាងជើងបឹងទន្លេសាប។

ជាមួយគ្នានេះ ក្នុងឱកាសបុណ្យចូលឆ្នាំថ្មីប្រពៃណីជាតិខាងមុខនេះ សង្ឃឹមថា នឹងមានភ្ញៀវទេសចរជាតិ និងអន្តរជាតិយ៉ាងច្រើនកុះករ ចូលមកទស្សនាកម្សាន្តនៅសហគមន៍បឹងពារាំង៕