វិទ្យុជាតិកម្ពុជា៖ ធីណា ឌីណេ ២៨ ០៣ ២០២៥
MC៖ រដ្ឋបាលខេត្តកំពង់ស្ពឺរំពឹងថា  ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ខេត្តនឹងទទួល បានភ្ញៀវទេសចរកើនឡើងជាងឆ្នាំកន្លងទៅ  ខណៈរដ្ឋបាលខេត្តបានរៀបចំកម្មវីធីលេងកម្សាន្តសប្បាយ ជាច្រើនកន្លៃងផ្សេងគ្នា ព្រមទាំង តំបន់ទេសចរណ៍នៅទូទាំងខេត្តក៏មានត្រៀមរៀបចំលេងល្បែងប្រជាប្រិយ ដើម្បីទទួល ស្វាគមន៍ភ្ញៀវទេសចរជាតិនិងអន្តរជាតិ។  អ្នកយកព័ត៌មានយើងធ្វើសេចក្តីរាយការណ៍បន្ថែម   
  លោកស្រ៊ុន ស្រ៊ន់​ អភិបាលរងខេត្តកំពង់ស្ពឺ និងជាប្រធានសហភាពសហព័ន្ធយុវជនកម្ពុជា ខេត្ត (ស.ស.យ.កខេត្ត) បានប្រាប់ក្រុមការងារវិទ្យុជាតិកម្ពុជាឱ្យដឹងថា ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ក្នុងឆ្នាំ២០២៥នេះ រដ្ឋបាលខេត្ត រំពឹងថា  នឹងទទួលបានកំណើនភ្ញៀវទេសចរកើនឡើងជាងឆ្នាំកន្លងទៅ ដោយសារតែឆ្នាំនេះ រដ្ឋបាល ខេត្ត និងស.ស.យ.កខេត្ត បានរៀបចំកម្មវិធីកម្សាន្តសប្បាយឱ្យ ប្លែកជាងឆ្នាំកន្លងទៅ និងនៅច្រើនកន្លែងផ្សេងគ្នា មានដូចជា៖  តំបន់ភូមិត្រជាក់ចិត្ត ភូមិល្បែងប្រជាប្រិយខ្មែរ ដោយមានការរៀបចំល្បែងប្រជាប្រិយ ខ្មែរបុរាណជា ច្រើនដូចជា ចោលឈូង បោះអង្គុញ់ លាក់កន្សែង វាយក្អម លោតបាវ ពាំពងមាន់ -ល-។ នៅក្នុងកន្លែងលេងកម្សាន្តសប្បាយទាំងនោះក៏មានរៀបចំកន្លែងសម្រាប់អ្នកទៅកំសាន្តបានចូលរួម បែនស្រូវ  វឹកឬកូរស្ករត្នោត ថតរូបភាពទុកជាអនុស្សាវរីយផងដែរ ។  
ជាងនេះទៅទៀត ក៏មានកន្លែង ភូមិប្រដាល់ធ្លាក់ទឹក និងកូនក្រមុំធ្លាក់ទឹក ភូមិសំនៀងឯក និងភូមិទឹកធ្លាក់ គឺជាភូមិដែលមានទឹកធ្លាក់ ពីលើអាកាសជាដើម។ លោកអភិបាលរងបានបន្ថែមថា ក្រៅពីការរៀបចំ កំពង់ស្ពឺសង្រា្កន្ត ខេត្តក៏នៅមានតំបន់រមណីយដ្ឋានទេសចរណ៍សំបូរបែបទាំងធម្មជាតិ និងកែច្នៃជាច្រើនផងដែរ។ ទន្ទឹមនឹងនោះ សម្រាប់នៅតាមទីតាំងផ្តល់សេវាកម្ម វិស័យទេសចរណ៍នៅទូទាំងខេត្ត  អាជ្ញាធរ បានជំរុញឱ្យមន្ត្រី ជំនាញបាន ចុះទៅពិនិត្យនិងណែនាំបន្ថែម លើការរក្សាអនាម័យបរិស្ថាន ការរៀបចំទីតាំង អាជីវកម្ម របស់ខ្លួនឱ្យមានភាពទាក់ទាញ និងការរក្សាតម្លៃបន្ទប់ស្នាក់នៅនិងម្ហូបអាហារ ដែលទាំងអស់នេះគឺ ជាចំណុចខ្លាំងក្នុងការទាក់ទាញភ្ញៀវទេសចរឱ្យមកលេងកម្សាន្តម្ដងហើយ ចង់មកម្ដងទៀត ។  
«ខ្ញុំសង្ឃឹមថានៅក្នុងឆ្នាំ២០២៥ លោកយាយ លោកតា អ៊ុពូមីង និងភ្ញៀវទេសចរ និងបន្តមក លេងកម្សាន្តនៅក្នុងខេត្តកំពង់ស្ពឺរបស់យើង ពីព្រោះយើងដឹងហើយថា បច្ចុប្បន្នទឹកដីខេត្តកំពង់ស្ពឺ បាន ពង្រីកសក្ដានុពលតំបន់ទេសចរណ៍បែបធម្មជាតិជាច្រើន ហើយមិនត្រឹមតែតំបន់ទេសចរណ៍បែបធម្មជាតិ ដែលយើងមានស្រាប់នោះទេ ក្នុងនោះក៏កំពុងតែពង្រីកថ្មីបន្ថែមទៀត រួមទាំងការវិនិយោគបន្ថែម ដូចជា ឧទ្យានជាតិគិរីរម្យ ដោយនៅទីនោះ គឺមានការវិនិយោគ ដែលមានការរៀបចំយ៉ាងស្អាត  មានជា រមណីយដ្ឋាន រីសត  និងកន្លែងលេងកម្សាន្តផ្សេងៗជាច្រើនទៀត ដូច្នេះខ្ញុំជឿជាក់ថាតាមការអភិវឌ្ឍ និងការពង្រីកការវិនិយោគ ក៏ដូចជាការទាក់ទាញ របស់ឯកឧត្តមបណ្ឌិត និងគោលការណ៍របស់ រាជរដ្ឋាភិបាល ក្នុងការអភិវឌ្ឍនានានៅក្នុងខេត្តកំពង់ស្ពឺ គឺ អាចទទួល បានភ្ញៀវទេសចរទាំងជាតិនិងអន្តរ ជាតិកាន់ តែកើនឡើងជាងឆ្នាំ២០២៤។»
  លោកស្រ៊ុន ស្រ៊ន់​ អភិបាលរងខេត្តកំពង់ស្ពឺ ក៏បានអំពាវនាវដល់អ្នកទេសចរក្នុងស្រុកដែលធ្វើដំណើរកម្សាន្ដឆ្លងកាត់តាមខេត្ដកំពង់ស្ពឺ កុំភ្លេចចូលមកលេងកម្សាន្ដនៅតាមរមណីយដ្ឋាននានា និង តំបន់សហគមន៍ទេសចរណ៍ ពិសេសក្នុងព្រឹត្តិការណ៍ កំពង់ស្ពឺ សង្ក្រាន្ត ស្ថិតនៅជុំវិញ បរិវេណវិមាន ឯករាជ្យ សួនច្បារសម្តេចព្រះសង្ឃរាជជួនណាត  សួនលោកតារាជមុខសាលាខេត្ត និងតាមបណ្តោយស្ទឹង ដោយមានកម្មវិធីកម្សាន្តសប្បាយជាច្រើន។   ព្រឹត្តិការណ៍នេះ មានរយៈពេល៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែមេសា ដើម្បីអបអរសាទរ ពិធីបុណ្យចូលឆ្នាំថ្មីប្រពៃណីជាតិខ្មែរ  ក្នុងនោះថ្ងៃទី១ គឺពិធីបើក ក្បាលព័្រត្រ ថ្ងៃទី២ ពិធីពូនភ្នំខ្សាច់ និងថ្ងៃទី៣ មានពិធីស្រង់ព្រះផងដែរ។
សូមបញ្ជាក់ថាក្នុងពិធីបុណ្យចូលឆ្នាំថ្មីប្រពៃណី ជាតិខ្មែរកាលពីឆ្នាំ២០២៤កន្លងទៅ ខេត្តទទួលបានភ្ញៀវទេសចរជាង២លាននាក់ ដែលទទួលបាន ការសារទរយ៉ាងខ្លាំងពីប្រជាពលរដ្ឋ ពិសេសភ្ញៀវទេសចរ៕