វិទ្យុជាតិកម្ពុជា៖អត្ថបទ៖ញ៉ែម ចាន់វិទ្យុជាតិចំការចេកខេត្តបាត់ដំបង

បាត់ដំបង៖ អ្នកស្រី សេង សំណាង ជាកូនខ្មែររស់នៅក្នុងខេត្តបាត់ដំបង វ័យ ៤១ ឆ្នាំ បានបង្កើតសហគ្រាសកែច្នៃបន្លែផ្លែឈើ ជាម្សៅ ហៅកាត់ថា «MLH អឹម អិល អេក »មានទីតាំងនៅភូមិអង់ សង្កាត់អូរចារ ក្រុងបាត់ដំបង  ដែលទិញវត្ថុធាតុដើម ពីប្រជាកសិករក្នុងស្រុកមានដូចជា ផ្លែចេកណាំវ៉ា រំដេង ខ្ជាយ រមៀត ដើម្បីកែច្នៃជាផលិតសម្រេចជួយផ្នែកសុខភាព និងមានការទទួលស្គាល់ពីមន្រ្តីជំនាញ ។

អ្នកស្រី រៀបរាប់ថា សហគ្រាសនេះផ្តើមបង្កើតឡើងតាំងពីឆ្នាំ ២០២១ កាលនោះជំងឺឆ្លងកូវីដ១៩ មិនទាន់ចប់នោះឡើយ ហើយដោយមើលឃើញដំណាំមើម និងផ្លែ របស់កសិករ អាចយកមកកែច្នៃ ជាអាហារជួយការពារសុខភាពរឹងមាំ និងជួយរកទីផ្សារ ដល់កសិករ ផ្នែកកសិកម្មថែមទៀតផងនោះ
ដូច្នោះអ្នកស្រី បានសហការទិញផលិតផលពីកសិករ ក្នុងស្រុកសំឡូត ជាង២០០ គ្រួសារ ដើម្បីបំពេញតម្រូវការផ្គត់ផ្គង់ មានដូចជា ខ្ញី ប្រមាណ១០ តោនក្នុងមួយឆ្នាំ  និងចេក១០ តោន ក្នុងមួយខែ ដែលអាចចូលរួមចំណែកជួយរកចំណូលដល់ពួកគាត់មួយកម្រិតទៀត សម្រាប់យកមកកែច្នៃ។

ចំណែកបច្ចេកទេសកែច្នៃវិញ អ្នកស្រីបញ្ជាក់ថា ឆ្លងកាត់ការត្រួតពិនិត្យត្រឹមត្រូវ និងដំណាក់កាលនីមួយៗ តាំងពីចិតសំបក លាងសំអាត យកមកសម្ងួត១០ទៅ ១២ម៉ោង ជាមួយម៉ាស៊ីន មានការកំណត់សីតុណ្ហភាព ដែលធានារក្សា សារធាតុចិញ្ចឹមបានល្អ និងផ្តល់អាហារូបត្ថម្ភ គ្រប់គ្រាន់ ។

អ្នកស្រីបន្តថា មុននឹងឈានដល់ការវេចខ្ចប់ ជាផលិតផលសម្រេច មានការត្រួតពិនិត្យនៅមន្ទីរពិសោធន៍ថ្នាក់ជាតិថែមទៀត ។
បច្ចុប្បន្ននេះសហគ្រាសកែច្នៃម្សៅបន្លែផ្លែឈើ បានអភិវឌ្ឍជាម្សៅបន្លែ ដែលមានលាយចេក ការ៉ុត ល្ពៅ   សណ្តែកសៀង ហើយក្លាយជាម្សៅភេសជ្ជៈ អាចញ៉ាំបានចំពោះមនុស្សគ្រប់វ័យ និងជួយផ្នែកសុខភាពថែមទៀតផង។

ដោយសារតែមានការគាំទ្រផលិតផលក្នុងស្រុក សម្រាប់ទីផ្សារវិញ អ្នកស្រីថា បច្ចុប្បន្ននេះ សហគ្រាសកែច្នៃបន្លែផ្លែឈើម្សៅ អាចផ្គត់ផ្គង់ទីផ្សារ ប្រមាណ៥ពាន់ប្រអប់ ក្នុងមួយខែៗ  ដែលក្នុងមួយប្រអប់មាន ២០កញ្ចប់តូចៗ តម្លៃ ៤ម៉ឺនរៀល ។
អ្នកស្រីក៏បានសូមឱ្យបងប្អូនបន្តការគាំទ្រ  ដើម្បីចូលរួមលើកស្ទួយផលិតផលក្នុងស្រុក ដែលកែច្នៃចេញពីវត្ថុធាតុដើម របស់កសិករ៕