វិទ្យុជាតិកម្ពុជា ឈួន សំអាត 02-04-2025
ភ្នំពេញ៖ ឯកឧត្តម ម៉ម ប៊ុននាង ប្រធានគណៈកម្មការអង្កេត បោសសម្អាត និងប្រឆាំងអំពើពុករលួយ នៃព្រឹទ្ធសភា (គណៈកម្មការទី១០) នាព្រឹកថ្ងៃពុធ ទី២ ខែមេសា ឆ្នាំ២០២៥នេះ បានអនុញ្ញាតឱ្យគណៈប្រតិភូមូលនិធិចែករំលែកសង្គ្រោះជីវិតសកល នៃសាធារណៈរដ្ឋកូរ៉េ (Global Life Sharing) ដឹកនាំដោយ ឯកឧត្តម ByongJang Min   តំណាង Global Life Sharing ប្រចាំនៅកម្ពុជា ចូលជួបពិភាក្សាការងារ និងសម្តែងការគួរសម នៅបន្ទប់ប្រជុំគណៈកម្មការទី១០ព្រឹទ្ធសភា។
ជំនួបខាងលើនេះ ក្នុងគោលបំណងពង្រឹងពង្រីកទំនាក់ទំនង និងកិច្ចសហប្រតិបត្តិការដែលមានស្រាប់ ឱ្យកាន់តែល្អប្រសើរថែមទៀត តាមរយៈការផ្លាស់ប្តូរព័ត៌មាន អំពីការរៀបសម្របសម្រួលអំណោយមនុស្សធម៌លើកទី៩ និងលើកទី១០ របស់មូលនិធិចែករំលែកសង្គ្រោះជីវិតសកលនៃសាធារណៈរដ្ឋកូរ៉េ មកកាន់ព្រឹទ្ធសភា នៃព្រះរាជាណាចក្រកម្ពុជា ឱ្យបានទាន់ពេលវេលា និងស្របតាមតម្រូវការពិតប្រាកដរបស់ប្រជាពលរដ្ឋក្រីក្រ និងងាយរងគ្រោះនៅកម្ពុជា៕