វិទ្យុជាតិកម្ពុជា កញ្ញា ខៀវ ណាវីន ថ្ងៃទី១៧ មេសា ២០២៥

អន្តរជាតិ៖ កាលពីថ្ងៃពុធ ក្រសួងការបរទេសសហរដ្ឋអាមេរិកបាននិយាយថា រដ្ឋមន្ត្រីការបរទេសអាមេរិកលោក Marco Rubio បានពិភាក្សាគ្នាអំពីពន្ធគយ និងវិធីដើម្បីធ្វើឱ្យស៊ីជម្រៅនៅកិច្ចសហប្រតិបត្តិការការពារជាតិ និងសន្តិសុខជាមួយប្រទេសឥណ្ឌូនេស៊ី នៅក្នុងកិច្ចប្រជុំជាមួយរដ្ឋមន្ត្រីការបរទេសរបស់ប្រទេសឥណ្ឌូនេស៊ី។ នេះបើយោងតាមការចេញផ្សាយដោយ សារព័ត៌មាន Reuters។ ក្រសួងការបរទេសបាននិយាយនៅក្នុងសេចក្តីថ្លែងការណ៍មួយថា លោក Rubio និងរដ្ឋមន្ត្រីការបរទេសឥណ្ឌូនេស៊ី "បានពិភាក្សាគ្នាអំពីវិធីដើម្បីធ្វើឱ្យស៊ីជម្រៅនូវកិច្ចសហប្រតិបត្តិការលើវិស័យការពារជាតិ និងសន្តិសុខ រួមទាំងកិច្ចខិតខំប្រឹងប្រែងដើម្បីលើកកម្ពស់សេរីភាពនៃការធ្វើនាវាចរណ៍ និងការហោះហើរលើសមុទ្រនៅសមុទ្រចិនខាងត្បូង ដោយស្របតាមច្បាប់អន្តរជាតិ"។ នាយកដ្ឋាននេះក៏បានបន្ថែមទៀតថា មន្ត្រីការទូតកំពូលក៏បានពិភាក្សាអំពីពន្ធទៅវិញទៅមករបស់សហរដ្ឋអាមេរិកទៅលើប្រទេសឥណ្ឌូនេស៊ី ហើយលោក Rubio "ក៏បានស្វាគមន៍ចំពោះកិច្ចខិតខំប្រឹងប្រែងរបស់ឥណ្ឌូនេស៊ីក្នុងការណែនាំកំណែទម្រង់សេដ្ឋកិច្ចឆ្ពោះទៅរកទំនាក់ទំនងពាណិជ្ជកម្មដោយស្មើភាព និងមានតុល្យភាព"៕