វិទ្យុជាតិកម្ពុជា គឹមហឿន
ស្ទឹងត្រែង ៖ អាជ្ញាធរស្រុកសេសាន ខេត្តស្ទឹងត្រែងបានក្រើនរំលឹកបន្ថែម ដល់ប្រជាពលរដ្ឋនិងជនជាតិដើមភាគតិច រស់នៅភូមិច្រប់ ឃុំក្បាលរមាស ឱ្យបង្កើនការអនុវត្តការងារបង្ការជំងឺកូវីដ-១៩ឱ្យកាន់តែមានប្រសិទ្ធភាព ដើម្បីការពារកុំឱ្យ ជំងឺដ៏កាចសាហាវនេះរាតត្បាតចូលក្នុងសហគមន៍។
ក្នុងពិធីសែនលាបំណន់ដល់អ្នកតាឈូកស នៅភូមិច្រប់ឃុំក្បាលរមាសស្រុកសេសានខេត្តស្ទឹងត្រែង លោក សុវណ្ណ ពិសេដ្ឋ អភិបាលស្រុកសេសានបានណែនាំឱ្យប្រជាពលរដ្ឋត្រូវចងចាំ និងបង្កើនការធ្វើអនាម័យគ្រប់យ៉ាង មិនត្រូវភ្លេចខ្លួន ចំពោះជំងឺកូវីដ-១៩នោះទេ ទោះបីថានៅភូមិ ឃុំ ស្រុកយើង គ្មានជំងឺកូវីដ-១៩ក៏ដោយ។ ការធ្វើអនាម័យបានល្អ ពាក់ម៉ាស់លាងដៃនឹងសាប៊ូ ឬអាល់កុល មិនមែនបង្ការតែជំងឺកូវីដ-១៩មួយមុខទេ គឺបង្ការជំងឺឆ្លងបានគ្រប់ប្រភេទ ដូចជា រាគ ឈឺពោះ ឈឺក្បាល ក្អកក្អួតជាដើម ហើយបើមានសុខភាពមិនស្រួល ត្រូវទៅពិគ្រោះជាមួយមន្ត្រីផ្នែកសុខភាព និងត្រូវ ទាក់ទងជួយគ្នាទៅវិញទៅមក ឬទៅមណ្ឌលសុខភាពដែលនៅជិតផ្ទះ។
លោក អ៊ុយ ថន តំណាងឱ្យប្រជាពលរដ្ឋបានមកចូលរួមក្នុងពីធី(លាបំណន់)នេះបានអះអាងថា៖ប្រជាពលរដ្ឋនាំគ្នា អនុវត្តបានយ៉ាងខ្ជាប់ខ្ជួនតាមវិធានការរបស់រាជរដ្ឋាភិបាល និងធ្វើតាមការណែនាំរបស់ក្រសួងសុខាភិបាល ព្រមទាំងបាន បន់ស្រន់ដល់អ្នកតាឈូកសនៅទីនេះ ឱ្យជួយបញ្ចៀសមិនឱ្យកើតជំងឺកូវីដ-១៩នៅក្នុងភូមិ។
លោកថា៖ការបន់ស្រន់នេះហើយទើបនៅថ្ងៃនេះ បងប្អូននាំគ្នាមកធ្វើពិធីសែនលាបំណន់នៅចំពោះមុខអ្នកតាឈូកស ព្រោះប្រជាពលរដ្ឋបានបែបន់រយៈពេលមួយឆ្នាំមកហើយ ដូចនេះត្រូវតែនាំគ្នាយក នំចំណី ម្ហូបអាហារ សាច់ជ្រូក-មាន់-ត្រី មកដាក់ជាដង្វាយហើយសុំសេចក្តីសុខចម្រើនតទៅទៀត។
សូមបញ្ជាក់ថា៖នេះជាការយល់ឃើញរបស់បងប្អូនប្រជាពលរដ្ឋយើងទៅតាមជំនឿ និងនៅតាមតំបន់ នៃការរស់នៅខុសៗគ្នា តែប៉ុណ្ណោះ តែប្រការសំខាន់នោះគឺសូមបងប្អូនបង្កើនការអនុវត្តនូវវិធានការអនាម័យតាមការណែនាំរបស់ក្រសួងសុខាភិបាល ឱ្យបានជាប្រចាំ ទើបការពារបានជំងឺកូវីដ-១៩៕
Comments