ថៃសង្ឃឹមលើការនាំចេញអង្ករកាន់តែខ្ពស់ទៅកាន់ប្រទេសអ៊ីតាលី

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ លោក Phumtham Wechayachai ឧបនាយករដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្មថៃបានជឿជាក់ថា ប្រទេសនេះអាចនាំចេញអង្ករផ្កាម្លិះកាន់តែច្រើនទៅកាន់ប្រទេសអ៊ីតាលី ដោយសារតែឥណ្ឌាបានរឹតបន្តឹងការនាំចេញរបស់ខ្លួន ហើយអ្នកនាំចេញពីរផ្សេងទៀតត្រូវបានដកហូតសិទ្ធិពន្ធដោយសហភាពអឺរ៉ុប (EU)។ នេះបើយោងតាមការចេញផ្សាយដោយសារព័ត៌មាន Vietnam Plus។ មន្ត្រីរូបនេះបានឱ្យដឹងថា លោកបានណែនាំតំណាងពាណិជ្ជកម្មនៅស្ថានទូតថៃឱ្យស្វែងរកឱកាសនាំចេញ។ បេសកជននៅទីក្រុងរ៉ូមបានឆ្លើយតបដោយនិយាយថាប្រទេសអ៊ីតាលីត្រូវការអង្ករបន្ថែមទៀតដោយសារតែគ្រោះរាំងស្ងួត។ លោកបានបន្តថា សហភាពអឺរ៉ុបបានដកឯកសិទ្ធិពន្ធសម្រាប់ប្រទេសវៀតណាម និង មីយ៉ាន់ម៉ា នៅឆ្នាំនេះ។ តួលេខពី Global Trade Atlas បានបង្ហាញថា ជាមួយនឹងការកើនឡើងប្រចាំឆ្នាំ ១៦,០១% នៃការនាំចេញអង្ករទៅកាន់ប្រទេសអ៊ីតាលីកាលពីឆ្នាំមុន ប្រទេសថៃបានក្លាយជាប្រទេសនាំចេញអង្ករធំទីបីរបស់ប្រទេសបន្ទាប់ពីប៉ាគីស្ថាន និងឥណ្ឌា៕