វិទ្យុជាតិកម្ពុជា៖ លោកចេម ហួត
ភ្នំពេញ៖ សាលាគុនកម្ពុមហាវេទដែលមានទីតាំងស្ថិតនៅភូមិ ត្រពាំងទា, សង្កាត់ពងទឹក ខណ្ឌដង្កោ ភ្នំពេញ កាលពីរសៀល ថ្ងៃទី០៤ ខែមេសា ឆ្នាំ២០២៤ បានរៀបចំការប្រកួតប្រដាល់ថ្នាលគុនខ្មែរលើកទី៤ ដោយមានការចូលរួមជាអធិបតីពីសំណាក់ឯកឧត្តម ម៉ក់សំអុលទីប្រឹក្សាសម្តេចតេជោ ហ៊ុន ប្រធានព្រឹទ្ធសភាកម្ពុជា និងជាទីប្រឹក្សាជាន់ខ្ពស់គណៈកម្មការជាតិអូឡាំពិកកម្ពុជា។
ឯកឧត្តមទេព វីរៈទីប្រឹក្សាក្រសួងមហាផ្ទៃ និងជានាយកសាលាគុនកម្ពុមហាវេទបានមានប្រសាសន៍ថា នេះជាលើកទី៤ហើយ ដែលសាលាគុនរបស់ឯកឧត្តមបានរៀបចំប្រដាល់ថ្នាលគុនខ្មែរបែបនេះ ដើម្បីផ្តល់ឱកាសដល់កុមារ និងយុវជន បន្ទាប់ពីពួកគេហ្វឹកហាត់ក្បាច់គុនខ្មែរអាចបញ្ចេញសមត្ថភាព និងដកស្រង់បទពិសោធន៍លើសង្វៀនជាក់ស្តែង។ មួយវិញទៀតការៀបចំប្រដាល់គុនខ្មែរនេះ ក៏ដើម្បីជួបជុំកីឡាករកីឡាការិនី អ្នកស្រឡាញវិស័យគុនខ្មែរបានជួបជុំគ្នាបង្កើនការសប្បាយរីករាយ ក្នុងឱកាសបុណ្យចូលឆ្នាំខ្មែរផងដែរ។
ឯកឧត្តមទេព វីរៈបញ្ជាក់ថា ការប្រកួតកីឡាមានចាញ់មានឈ្នះជារឿងធម្មតា ប៉ុន្តែសម្រាប់ការប្រកួតថ្នាលគុនខ្មែរនេះ បានផ្តល់បទពិសោធន៍យ៉ាងច្រើនដល់កីឡាករជំនាន់ក្រោយជាពិសេសបានបញ្ចេញសមត្ថភាពប្រកួតលើសង្វៀនជាក់ស្តែងដើម្បីឈានទៅជាកីឡាករប្រដាល់អាជីពនាពេលអនាគត។
សូមបញ្ជាក់ថា កីឡាករទាំង១២រូប ដែលចូលរួមប្រកួតប្រដាល់ថ្នាលគុនខ្មែរលើកទី៣នេះ ទាំងអ្នកឈ្នះ និងចាញ់សុទ្ធតែទទួលបានប្រាក់ឧបត្ថម្ភពីឯកឧត្តមនាយកសាលាគុនកម្ពុមហាវេទ ពីបណ្តាក្រុមហ៊ុន នានានិងសប្បុរសជនមួយចំនួនផងដែរ៕
Comments