វិទ្យុជាតិកម្ពុជា៖ អត្ថបទ លោក មួន ចរិយា
ប៉ៃលិន៖ លោក ចេង ញ៉ាន់ អភិបាលរងខេត្តប៉ៃលិនបានមានប្រសាសន៍ណែនាំឱ្យអាជ្ញាធរគ្រប់លំដាប់ថ្នាក់ ត្រូវបង្កើន និងពង្រឹងសកម្មភាពការងារឱ្យមានប្រសិទ្ធភាពទ្វេដងថែមទៀត ដើម្បីផ្ដល់ភាពកក់ក្ដៅនិង បង្កើនជំនឿទុកចិត្តរបស់ប្រជាពលរដ្ឋ លើការដឹកនាំរបស់រាជរដ្ឋាភិបាលបន្តថែមទៀត។
ក្នុងកិច្ចប្រជុំផ្សព្វផ្សាយត្រៀមលក្ខណៈសម្បត្តិសម្រាប់ការចូលរួមសន្និសីទសារព័ត៍មាននៅទីស្តីការគណៈរដ្ឋមន្រ្តី ស្តីពី”វឌ្ឍនភាព និងទិសដៅការងារបន្តរបស់ក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ សង្កាត់ នាព្រឹកថ្ងៃទី ២៦ ខែមករា ឆ្នាំ២០២១ លោកអភិបាលរង ខេត្តបានក្រើនរំលឹកដល់ អាជ្ញាធរនិងអង្គភាពពាក់ព័ន្ឋទាំងអស់ត្រូវយកចិត្តទុកដាក់ នឹងការងារឱ្យមានលក្ខណៈល្អប្រសើរលើគ្រប់វិស័យជាពិសេសការផ្តល់សេវាសាធារណៈ ជូនប្រជាពលរដ្ឋ។
លោកសង្កត់ធ្ងន់ថា អាជ្ញាធរមានសមត្ថកិច្ចជំនាញទាំងអស់ គឺចាប់ពីពេលនេះទៅ ត្រូវបង្កើននិងពង្រឹងសកម្មភាពការងារ ឱ្យបានសស្រាក់សស្រាំ និងប្រឹងប្រែង ឱ្យអស់ពីកម្លាំងកាយកម្លាំងចិត្ត ប្រាជ្ញាស្មារតី ពិសេសការចូលរួម រក្សាការពារ ឱ្យបានល្អប្រសើរថែមទៀត ក្នុងការប្រយុទ្ធប្រឆាំងជំងឺកូវីដ-១៩។
សូមបញ្ជាក់ថា កិច្ចប្រជុំផ្សព្វផ្សាយត្រៀមលក្ខណៈសម្បត្តិសម្រាប់ការចូលរួម សន្និសីទ សារព័ត៌មាននៅទីស្តីការគណៈរដ្ឋមន្រ្តី ស្តីពី”វឌ្ឍនភាព និងទិសដៅការងារបន្តរបស់ ក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ សង្កាត់នាពេលនោះ ក៏មានការអញ្ជើញ ចូលរួមពីសំណាក់ លោកនាយក នាយករងរដ្ឋបាលខេត្ត លោក-លោកស្រី អភិបាល-អភិបាលរង ក្រុង-ស្រុក និង លោក-លោកស្រី ប្រធាន-អនុប្រធានមន្ទីរជុំវិញខេត្ត ព្រមទាំង មេឃុំ-ចៅសង្កាត់ផងដែរ ដើម្បីដោះស្រាយបញ្ហានានាជួនប្រជាពលរដ្ឋ ឱ្យទទួលបាន សេវាសាធារណៈល្អប្រសើរ៕
Comments