ក្នុង ឆ្នាំ ២០២៣ វិស័យ កសិកម្ម ហ្វីលីពីន កើន ១,២ ភាគរយ

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ នាយកដ្ឋានកសិកម្មហ្វីលីពីន (DA) បាននិយាយថា វិស័យកសិកម្មហ្វីលីពីនបានកើនឡើង ១,២ ភាគរយក្នុងឆ្នាំ ២០២៣ ដែលជំរុញដោយផលិតកម្មបសុបក្សី និងបសុសត្វ ការកើនឡើងនៃការប្រមូលផលផ្លែឈើ និងទិន្នផលស្រូវ។ នេះបើយោងតាមការចេញផ្សាយដោយសារព័ត៌មាន Xinhua។ លោក Francisco Tiu Laurel រដ្ឋលេខាធិការក្រសួងកសិកម្មហ្វីលីពីនបាននិយាយថា "កសិកម្មបានរួមចំណែកជាវិជ្ជមានដល់កំណើន សេដ្ឋកិច្ចកាលពីឆ្នាំមុន ប៉ុន្តែប្រាកដណាស់យើងអាចធ្វើបានច្រើនជាងនេះ"។ ដោយដកស្រង់ទិន្នន័យរបស់អាជ្ញាធរស្ថិតិហ្វីលីពីន នាយកដ្ឋាននេះបាន និយាយថា វិស័យកសិកម្មបានកើនឡើងត្រឹមតែ ០,៦ ភាគរយក្នុងឆ្នាំ ២០២២។ គេបានបន្ថែមថាវិស័យនេះបានរួមចំណែក៩ ភាគរយ នៃផលិតផលក្នុងស្រុកសរុបក្នុងឆ្នាំ ២០២៣ និងមាន ប្រហែល ២៥ ភាគរយនៃប្រជាជនហ្វីលីពីន ៤៩,៧ លាននាក់នៅក្នុងកម្លាំងពលកម្មគិតត្រឹមខែវិច្ឆិកាឆ្នាំមុន។ ក្នុងឆ្នាំ ២០២៣ នាយកដ្ឋានបាននិយាយថា ប្រទេសហ្វីលីពីនបានប្រមូលផលស្រូវចំនួន ២០,០៦ លានតោន ដែលជួយកាត់បន្ថយការនាំចូលអង្ករដល់ ៣,៥ លានតោនពី ៣,៨ លានតោនក្នុងឆ្នាំ ២០២២ និងបានបង្កើនប្រាក់ចំណូលរបស់កសិករ៕