ចិន អាមេរិក ជប៉ុន ជាប្រទេសនាំចូលផលិតផលនេសាទរបស់វៀតណាមច្រើនជាងគេក្នុងត្រីមាសទី ១

វិទ្យុជាតិកម្ពុជា កញ្ញា ខៀវ ណាវីន

អន្តរជាតិ៖ យោងតាមសមាគមអ្នកនាំចេញ និងផលិតអាហារសមុទ្រវៀតណាម (VASEP) បានឱ្យដឹងថា ប្រទេសចិន សហរដ្ឋអាមេរិក និងជប៉ុន គឺជាអ្នកនាំចូលធំបំផុតចំនួនបីនៃផលិតផលនេសាទរបស់វៀតណាមនៅក្នុងត្រីមាសទីមួយនៃឆ្នាំនេះ។ នេះបើយោងតាមការចេញផ្សាយដោយសារព័ត៌មាន Vietnam Plus។ ការនាំចេញទៅកាន់សហរដ្ឋអាមេរិកបានកើនឡើងខ្ពស់បំផុតគឺ ១៦% ចំនួន ៣៣០ លានដុល្លារជាមួយនឹងការនាំចេញបង្គា ត្រីធូណា ត្រីត្រា និងក្តាម។ ទន្ទឹម នឹង នេះការ នាំ ចេញ ទៅ កាន់ ប្រទេស ចិន និង ហុងកុង (ចិន) បាន កើន ឡើង ១៥%។ ប្រទេសចិនគឺជាប្រទេសនាំចូលដ៏ធំបំផុតនៃត្រីត្រា បង្គាជើងស បង្កង និងក្តាម។ ការនាំចេញទៅកាន់ប្រទេសជប៉ុនរួមមានបង្គាជើងស បានកើនឡើង ២០% ក្តាម ២៣% និងត្រីត្រា ២៥% បើធៀបនឹងរយៈពេលដូចគ្នាកាលពីឆ្នាំមុន។ លោក Le Hang ប្រធានផ្នែកទំនាក់ទំនងរបស់ VASEP បាននិយាយថា បន្ទាប់ពីពិព័រណ៍ផលិតផលជលផលអន្តរជាតិដែលបានធ្វើឡើងនៅសហភាពអឺរ៉ុប អាមេរិក និងជប៉ុន គេរំពឹងថាអ្នកនាំចេញវៀតណាមអាចទទួលបានការបញ្ជាទិញកាន់តែច្រើន ហើយផលិតផលវៀតណាមអាចលក់បានក្នុងតម្លៃសមរម្យ៕