សែលកាតអបអរសាទរដល់ក្រុមឈ្នះការប្រកួត PUBG Mobile Club Open (PMCO)ដែលបានរៀបចំលើកដំបូងនៅកម្ពុជា

Sep 20, 2021 ព័ត៌មានជាតិ

២០.០៩.២១ ដោយ កង.មុន្នីរ៉ា

ភ្នំពេញៈ សែលកាត និងសហព័ន្ធកីឡាអេឡិចត្រូនិកកម្ពុជា (EFC) បានប្រកាសនូវជ័យលាភីចំនួន ១៦ក្រុម ដែលបានឈ្នះក្នុងសមរភូមិវគ្គផ្តាច់ព្រ័ត្រការប្រកួត PMCO Cam-bodia។ ក្រុមឈ្នះទាំង ១៦ នឹងទទួលរង្វាន់ទឹកប្រាក់សរុបចំនួន ១៥,០០០ ដុល្លារ ជាមួយគ្នាដែរ Top Rank ទាំង ៦ ក្រុមនឹងតំណាងឲ្យប្រទេសកម្ពុជាទៅប្រកួតនៅសមរភូមិអន្តជាតិក្នុង PMCO SEA Wild Card ដែលត្រូវប្រកួតនឹងក្រុមជម្រុះមកពីមីយ៉ាន់ម៉ានិងហ្វីលីពីន។

ក្រុមតំណាងឲ្យប្រទេសកម្ពុជាទាំង ៦ រួមមាន៖

១. APG ESPORTS

២. ORANGE PLAY

៣. JOINME_BLACK

៤. TEAM MAX

៥. THE QUARTER

៦. ORG ACADEMY

ការប្រកួត PMCO SEA Wild Card នឹងរៀបចំឡើងនៅថ្ងៃទី២៤ ដល់ថ្ងៃទី២៦ ខែកញ្ញា ឆ្នាំ២០២១ដោយមានការផ្សាយផ្ទាល់ការប្រកួតផ្តាច់មុខនៅលើហ្វេសប៊ុក PlayGame របស់ក្រុមហ៊ុន សែលកាត។

ប្រទេសកម្ពុជា មិនដែលរៀបចំកម្មវិធី PUBG Mobile Club Open ពីមុនមនោះ ទេ ហើយ សែលកាត ក៏មានក្តីរំភើបយ៉ាងខ្លាំង ដោយវាជាឱកាសដ៏ល្អសម្រាប់បណ្តាអ្នកលេងហ្គេមទាំងអស់នៅកម្ពុជា។

ក្រុមហ៊ុន Xiaomi ប្រចាំប្រទេសកម្ពុជាដែលត្រូវបានប្រកាសជាផ្លូវការថាជាដៃគូ សហការនិងជាក្រុមហ៊ុនឧបត្ថម្ភរបស់ សែលកាត PlayGame ក៏ជូយគាំទ្រនូវយុទ្ធសាស្ត្រផ្នែកទីផ្សារ ក្នុងការបង្កើតការយល់ដឹងដ៏ទូលំទូលាយសម្រាប់ PMCO និងផ្តល់ជូនរង្វាន់ ពិសេសៗដល់បណ្តាក្រុមដែលឈ្នះ។

លោក Simon Perkins នាយកប្រតិបត្តិក្រុមហ៊ុន សែលកាត បានចូលរួមអបអរសាទរ ដល់ក្រុមដែលបានឈ្នះការប្រកួតជម្រុះ PMCO ។ លោកបានមានប្រសាសន៍ថា៖ “យើងពិតជាមានមោទនភាពចំពោះក្រុមទាំងអស់ដែលបានចូលរួមក្នុងការប្រកួត PMCO។ ការបំផុសគំនិតរៀបចំការប្រកួតនេះធ្វើឲ្យយើងឃើញពីការរីកចម្រើននៃបណ្តាអ្នកលេងហ្គេមនៅកម្ពុជា និងបង្ហាញឲ្យឃើញពីការអភិវឌ្ឍន៍នៃក្រុមប្រកួតផងដែរ។ ការប្រកួតនេះគឺជាការបង្ហាញទាំងជំនាញនិងទេពកោសល្យរបស់ក្រុមកម្ពុជា និងការត្រៀមខ្លួនរបស់ពួកគេដែលជាតំណាងឱ្យប្រទេសកម្ពុជាលើឆាកអន្តរជាតិ។ យើងសូមជូនពរឱ្យក្រុមទាំង ៦ ដែលជាតំណាងឱ្យប្រទេសកម្ពុជានៅក្នុងការប្រកួត PMCO SEA Wild Card ជួបតែសំណាងល្អ”។

លោកបានបន្ថែមទៀតថា ក្នុងនាមជាប្រតិបត្តិករទូរស័ព្ទចល័តឈានមុខគេនៅកម្ពុជាសម្រាប់កីឡាអេឡិចត្រូនិក និងជាដៃគូសហការផ្តាច់មុខរបស់សហព័ន្ធកីឡាអេឡិចត្រូនិក សែលកាត នឹងបន្តពង្រីកនូវកម្មវិធីលំដាប់ថ្នាក់ជាតិរបស់ខ្លួន ដែលធានានូវការចូលរួមពីក្រុមតំណាងឲ្យប្រទេសកម្ពុជាក្នុងការប្រកួតលំដាប់ថ្នាក់អន្តរជាតិ។ យើងនៅតែបន្តគាំទ្រនិង កសាងសហគមន៍កីឡាអេឡិចត្រូនិកនៅកម្ពុជា ក្នុងការរៀបចំការប្រកួត SEA Games ឆ្នាំ២០២៣ ដែលកម្ពុជាធ្វើជាម្ចាស់ផ្ទះ៕

IMG_20210920_171613_204